وەزیری تەندروستی باس لە قەدەغەی هاتووچۆ و نەکردنەوەی قوتابخانەکان دەکات

لڤین:

وەزیری تەندروستی حكومەتی هەرێم رایدەگەیەنێت، بەپێی خەمڵاندنەكان لەئێستادا دەرگای قوتابخانەكان ناكرێنەوە، دەشڵێت: دەکرێت قەدەغەی هاتووچۆی سنووردار، رێژەیی، ڕابگەیەنرێت بۆ ئەوەی هەڵکشانی تووشبوونی کۆرۆنا هێواش بکرێتەوە.

د.سامان بەرزنجی، وەزیری تەندروستیی هەرێمی كوردستان، لەبارەی دەوامی خوێندنگەكان رایگەیاند، بەهۆی زۆربوونی حاڵەتەكانی تووشبوون بەكۆرۆنا، بەركەوتن و چوونە ناو پۆل مەترسیدارە، بۆیە بەپێی خەمڵانەكانی ئێستا داخستنی دەرگای قوتابخانەكان درێژ دەكرێتەوە.

وەزیری تەندروستی، ڕاشیگەیاند کە بەداخەوە لە هەرێمی کوردستان تاوەکو ئێستاش ئێمە بەرەو لووتکەی تووشبوونی کۆرۆنا دەڕۆین، لە بارەی ڕاگەیاندنی قەدەغەی هاتووچۆشەوە، وتی: ناکرێت قەدەغەی هاتووچۆی تەواوەتی رابگەیێنین، بەڵام دەکرێت قەدەغەی هاتووچۆی سنووردار، رێژەیی، لە شوێنی جیاواز بۆ توێژی جیاواز جێبەجێ بکرێت بۆ ئەوەی هەڵکشانەکە هێواش بکرێتەوە.

لە لایەکی دیکەوە عەبدولسەلام دۆڵەمەڕی، سەرۆكی لیژنەی پەروەردە و خوێندنی باڵا لەپەرلەمانی كوردستان لەكۆنگرەیەكی رۆژنامەوانیدا رایگەیاند، بەهۆی زۆربوونی حاڵەتەكانی كۆرۆنا، پێناچێت بەمنزیكانە پڕۆسەی خوێندنی ناو پۆل دەست پێبكاتەوە.

دوای نزیكەی ساڵێك لەوەستانی پڕۆسەی خوێندن لەناو قوتابخانەكان بەهۆی ڤایرۆسی كۆرۆناوە، رۆژی 7ی شوباتی ئەمساڵ، دەرگای قوتابخانەكان كرانەوە، بەڵام بەهۆی زیادبوونی حاڵەتەكانی كۆرۆناوە، جارێكی دیكە خوێندن تا رۆژی 10ی ئەم مانگە راگیرایەوە.

بابەتی پەیوەندیدار

Back to top button