ئێران دوا هۆشداری دەداتە بەرپرسانی عێراق و هەرێم

لڤین:

فەرماندەی هێزی وشکانی سوپای پاسداران، بەرپرسانی عێراق و هەرێمی کوردستان رادەسپێرین تاوەکوو گرووپەکانی دژبەری شۆڕش (ئێران) لە باکووری عێراق دەربکەن، چونکە ئەگەر دەریاننەکەن ئێمە ئەرکی خۆمان بۆ لەنێوبردنی بنکەکانیان دەگرینەبەر.

ئەمڕۆ ( چوارشه‌ممه‌ ٢٩ی ئه‌یلوولی ٢٠٢١ )،  محەممەد پاکپوور، فەرماندەی هێزی وشکانی سوپای پاسداران لە کۆبوونەوەی “رێزگرتن” لە کوژراوانی “پێشمەرگە موسڵمانەکانی کورد”  لە شاری سنە، ڕایگەیاند،” پێشتر رامانگەیاندووە جوڵە و بنکەی دژبەرانی شۆڕش قبوڵ ناکەین و بە تووندی بەرەنگاری دەبینەوە”.

جێگەی ئاماژە پێدانە،” بەرپرسانی سیاسی و سەربازی ئێران لە ماوەی دوو مانگی رابردوودا زۆر جار پێداگرییان لەسەر ئەو داواکارییانە لە عێراق و حکومەتی هەرێمی کوردستان کردووەتەوە و هەڕەشەیان لە حزبەکانی رۆژهەڵاتی کوردستان کردووە”.

بۆ یەکەمجار عەلی شەمخانی، سکرتێری ئەنجوومەنی باڵای ئاسایشی نیشتمانی ئێران رۆژی ( ١٠ / ٨ / ٢٠٢١ ) لە کۆبوونەوەی لەگەڵ فوئاد حوسێن، وەزیری دەرەوەی عێراق، داوای دەرکردنی حزبەکانی رۆژهەڵاتی کوردستانی کرد.

دواتر محەممەد پاکپوور، فەرماندەی هێزی وشکانی سوپای پاسداران رۆژی ( ٦ / ٩ / ٢٠٢١ ) رایگەیاند،” سەرەڕای چەندینجار ئاگادارکردنەوەی بەرپرسانی هەرێمی کوردستان لەبارەی چالاکی هێزەکانی دژبەری کۆماری ئیسلامی، بەڵام هێشتا ئەو هێزانە چالاکییان هەیە، بۆیە دانبەخۆداگرتنی سوپاش کۆتاییهاتووە و کۆماری ئیسلامی وەڵامێکی تووندی ئەو چالاکییانە دەداتەوە”.

حزبەکانی رۆژهەڵاتی کوردستان لە ساڵی ( ١٩٨٣ ) و دوای ئەوەی کۆماری ئیسلامی ئێران دەستی بەسەر ناوچە رزگارکراوەکانی رۆژهەڵاتی کوردستاندا گرتەوە، بنکە و بارەگاکانیان لە باشووری کوردستان جێگیرکرد.