وەزارەتی بەرگریی تورکیا کۆتایی هاتنی ئۆپەراسیۆنی گارەی ڕاگەیاند

لڤین:

وەزارەتی بەرگریی تورکیا، کۆتایی هاتنی ئۆپەراسیۆنەکەی گارە (چنگی هەڵۆ -2)ی ڕاگەیاند.

ئەمڕۆ خلوسی ئاکار، وەزیری بەرگریی تورکیا، لەگەڵ یاشار گولەر، سەرۆک ئەرکانی سوپای تورکیا و ژمارەیەک فەرماندەی باڵای سەربازی وڵاتەکەی، دوای بەسەر کردنەوەی ئەو ناوەندەی ئۆپەراسیۆنەکەی گارە (چنگی هەڵۆ -2)ی لێوەبەڕێوەدەبرا لە پارێزگای شرناخی باکوری کوردستان، کۆتایی هاتنی ئۆپەراسیۆنەکەی ڕاگەیاند.

خلوسی ئاکار، لە بارەی ئەنجامی ئۆپەراسیۆنەکەوە ڕایگەیاند کە ئۆپەراسیۆنێكی زۆر تایبەتیان کردووە، زیاتر لە 50 گەریلا كوژراون، 3 سەربازیش كوژراون و 3ی دیكەش بریندار بوون، هەروەها وتی: لە كاتی گەڕان لەنێو ئەشكەوتێكدا تەرمی 13 هاوڵاتی سڤیل دۆزراونەتەوە.

ئەو وتانەی ئاکار لە کاتێکدایە کە میدیاییەكانی نزیک لە پەکەکە و ڕاگەیەندراوەکانی هەپەگە، باس لەوەدەکەن کە تورکیا لە ئۆپەراسیۆنەکەیدا ئامانجی خۆی نە پێکاوە، چونکە ویستویەتی دیلەكانی خۆی رزگار بكات یان بكوژێت، بەڵام سەركەوتوو نەبووە لە رزگاركردنیان و گەریلا بەرگرییەكی بەهێزی كردووە، هەروەها ئاماژە بۆ ئەوەشدەکەن کە دەیان سەربازی توركیا كوژراون کە دوویان بەرپرسی باڵای سەربازیی بوون و دەیانی دیكەشیان لێ بریندار بووە.

سوپای تورکیا لە بەرەبەیانی 10ی ئەم مانگەدا بە هێزێکی زۆرەوە ئۆپەراسیۆنی بۆسەر چیای گارە لە سنوری پارێزگای دهۆک دەستپێکرد.

 

بابەتی پەیوەندیدار

Back to top button