دوو کەس بەبڕێک 25 هەزار دیناری ساختەوە دەستگیرکران
لڤین:
بەڕێوەبەرایەتی پۆلیسی سۆران، دەستگیر کردنی دوو کەسی بە ڕەگەز ئێرانی ڕاگەیاند کە پارەی ساختەیان لە بازاڕدا ساغکردوەتەوە و لە کاتی دەستگیر کردنیشیاندا، پۆلیس دەستی بەسەر نزیکەی ٥ ملیۆن دینار ٢٥ هەزار دیناری ساختدا گرتووە.
لەو بارەیەوە بەڕێوەبەرایەتی پۆلیسی سۆران، لە ڕاگەیەنراویکدا ئاشکرایکرد، “دوای ئاگادار کردنەوەی نوسینگەی نەھێشتنی تاوانی سۆران لەلایەن چەند کاسبکارێکی ناوبازاڕ کەوا دراوی (٢٥٠٠٠)بیست و پێنج ھەزاری ساختەیان وەرگرتووە، پەڕاوی لێکۆڵینەوەیان بۆ ڕێکخستن”.
پۆلیسی سۆران ئاماژەی بۆ ئەوەشکردووە کە “دوای بەدواداچوونی ورد لەلایەن نوسینگەی نەھێشتنی تاوانی سۆران توانرا تۆمەتباری سەرەکی بدۆزرێتەوە و بەبڕیاری بەڕێز دادوەری لێکۆڵینەوەی سۆران دەستگیر بکرێت کەناوی (م،ا،ف) لەدایکبووی (١٩٩٥) بەرەگەز ئێرانیە و دانی نا بەتاوانەکەیداناوە و ھەرلەشوێنی حەوانەوەی دەستگیرا بەسەر بڕی (٤٩٠٠٠٠٠) چوار ملیۆن و نۆ سەد ھەزار دیناری ساختە لەجۆری بیست و پێنج ھەزاری”
هەر لە ڕاگەیەنراوەکەدا بەڕێوەبەرایەتی پۆلیسی سۆران، ڕوونیشیکردوەتەوە کە “لەوتەکانی تۆمەتباری ناوبراودا دانی نا بەوەی کە کەسێکی تریشی لەگەڵ بووە و توانرا تۆمەتباری دوەمیش دەست گیربکرێت کە ناوی (ا،ص،م) لەدایکبووی (١٩٨٢) بەرەگەز ئێرانیە”.
لەئێستادا ھەردوو تۆمەتبار بەبڕیاری دادوەر ڕاگیراون بەپێی ماددە (٢٨١) لە یاسای سزدانی عێراقی لێکۆڵینەوە لەگەڵیان بەردەوامە.
