پاکتاوکردنى سولفه و پێشینە لەسەر پاشەکەوتی مووچە ڕەتدەکرێتەوە

لڤین:

وەزارەتی دارایی حكومەتی هەرێم بە بڕیارێك پاكتاوكردنی هەموو پێشینە و سولفەیەك لەسەر پاشەكەوتی موچە ڕەتدەكاتەوە تا ئەو كاتەی ئەنجومەنی وەزیران بڕیاری نوێی لەسەر دەردەكات.

وەزارەتی دارایی هەرێمی کوردستان  بە پێی نووسراوێک کە ئیمزای ئاوات شێخ جەناب، وەزیری دارایی لەسەرە و ڕۆژی ( ٣٠ی حوزەیران ) ئاماژە بەوەکراوە،” نابێ  هیچ سولفه و پێشینەیەک لەسەر پاشەکەوتی مووچە پاکتاو بکرێ”.

له بەشێکی تری نوسراوەکەدا هاتووە،” ئاگادارتان دەکەینەوە بەهیچ شێوەیەک ناکرێت لەسەر مووچەی فەرمانبەران هیچ جۆرە زیادە خەرجکردن و پێشینەیەک پاکتاو بکرێت، تاوەکوو ئەنجوومەنی وەزیران بەپێی یاسای چاکسازی بڕیاری لێ دەدات”.

هەروەها بە پێی نووسراوەکە،” نابێت قەرزێک یان سولفەیەک کە لەسەر فەرمانبەرە بخرێتەبەر پاشەکەوتی مووچە و ئەو بایەتەی بەستوەتەوە بە یاساییچاكسازی و بڕیاری ئەنجومەنی وەزیرانەوە.”

جیگەی ئاماژە پێدانە پێشتر ئەنجوومەنی پارێزگاکانی هەرێمی کوردستان پڕۆژەیەکیان بە ئەنجوومەنی وەزیران دابوو تاوەکوو قەرزاکانی ئاو و کارەبا و رسوماتەکانی ئەو بواره لەسەر پاشەکاوتی مووچە بدرێتەوە.

لە دانیشتنی ( ٢٨ی حوزەیران ) لە پەرلەمانی كوردستاندا كە بەشێك لە وەزیر و بەرپرسانی باڵای حكومەتی هەرێم ئامادەی بوون، ئامانج ڕەحیم، سکرتێری ئەنجومەنی وەزیرانی هەرێمی کوردستان ڕایگەیاند، کۆی گشتیی قەرزەكانی سەر حكومەتی هەرێم گەیشتووەتە ٣٧ ترلیۆن و ٣٩٤ ملیارد دینار.

سکرتێری ئەنجومەنی وەزیران ئاماژەی بەوەشكرد، ١٢ملیارد دۆلاری ئەو قەرزە، پارەی پاشەكەوتی مووچەی موچەخۆرانی هەرێمی كوردستانە.