قائیمقامیەتی سلێمانی: لە پێنج مانگدا 288 شوێنمان داخستووە
لڤین:
لەماوەی پێنج مانگدا لیژنەھاوبەشەکانی قائیمقامیەتی سلێمانی، نزیکەی 30 ھەزار سەردانیان بۆ شوێنەکان کردووە و 288 شوێنیان داخستووە و 239 هەزار تۆن خۆراك و شمەكیشیان لەناوبردووە.
ئەمڕۆ قائیمقامیەتی سلێمانی ئاماری پێنج مانگی یەکەمی ئەمساڵی چالاکییەکانی لیژنە هاوبەشەكانی بڵاوکردەوە.
بەگوێرەی ئامارەکە بەپێی راپۆرتێكی لیژنە هاوبەشەكان بۆ قائیمقامی سلێمانی، لە پێنج مانگی سەرەتای ئەمساڵدا واتە لە (1-1-2021 بۆ 31-5-2021) لیژنە هاوبەشەكانی قائیمقامیەتی سلێمانی كە پێكهاتووە لە (38) لیژنە و لە رووی تەندروستی و ژینگەیی و ڤێتێرنەر و كوالێتی و نرخەوە چاودێری هەموو ماركێت و شوێنكارێك دەكات، (29)هەزار و (603) سەردانی ئەنجام داوە و (288) داخستن هەبووە و (239) هەزار تۆن خۆراك و شمەك لەناوبراوە.
قائیمقامیەتی سلێمانی ئەوەشیخستوەتەڕوو کە هەر لەو ماوەیەدا لە پارێزگاكانی تری هەرێمی کوردستان سەردانی لیژنەکان بەجۆرێك بووە كە لە هەولێر سەردان (195)، داخستن (51)، لەناوبردن (298) هەزار و (212)تۆن و لە دهۆك سەردان (730) و داخستن (27) و لەناوبردن (6)تۆن بوو, لە هەڵەبجە سەردان (1300) و داخستن (20) و لەناوبردن (24) تۆن بووە.
ئەوە لە کاتێکدایە ژمارەی داخستنەکان لەسلێمانی لەبەرامبەر ژمارەی شوێنکار و مارکێت و چێشتخانەکان دەکاتە(0,78./.) واتە کەمترە لەسەدا یەک.
هەر بەپێی ئامارەکەی قائیمقامیەتی سلێمانی، داهاتی سزادان لەلایەن لیژنەكانی قائیمقامیەتی سلێمانییەوە (267) ملیۆن و (625) هەزار دینار بووە، لە بەرامبەردا لە هەولێر داهاتی سزادان (119)ملیۆن و لە دهۆك (8)ملیۆن و (250)هەزار دینار بووە.
بەپێی ئامارەکانیش دەردەکەوێت سەردانی لیژنە هاوبەشەکانی قائیمقامیەتی سلێمانی (150) ئەوەندەی سەردانی لیژنەکانی هەولێر و (41) ئەوەندەی لیژنەکانی دهۆک و (22) ئەوەندەی سەردانی لیژنەکانی هەڵەبجەیە.
