سەدر پەیامێک ئاڕاستەی پێشمەرگە و حەشد دەکات

لڤین:

موقتەدا سەدر، پێشمەرگە و حەشدی شەعبی لە چوارچێوەی هێزەئەمنییەكانی عێراقدان و پێویستە ڕێز لە سەروەری و شكۆی دەوڵەت بگرن و دەبێت تێڕوانینەكانیان نیشتمانیانە بێت.

موقتەدا سەدر ڕێبەری ڕەوتی سەدر ئەمڕۆ ( دووشيممە ٢١ی حوزەیرانی ٢٠٢١ ) پەیامێكی سێ لاپەڕەیی بڵاوكردەوە و باسی چەند پرسێكی تایبەت عێراق بەتایبەتی ( پێشمەرگە و هێزەچەکدارەکانی حەشد ) و سەرۆك كۆماری نوێی ئێران و پەیوەندیی نێوان ئێران و سعودییە دەكات و وەک هۆشداریەکیشە بۆ پلانی وڵاتانی ناوچەکە بەرامبەر عێراق.

لەسەرەتای پەیامەکە سەدر ئاماژەی بەوەداوە،” عێراق خاوەنی چەند تایبەتمەندییەكی جیاوازە لە چاو وڵاتانی ناوچەكە، هەروەها دوو تایبەتمەندی عەرەبی بوون و شیعەبوونی تێدایە، بەڵام مانای ئەوەنییە کە سوننە و کورد بوونیان نەبێت، بەڵكو ڕێزی زۆرمان هەیە بۆیان.”

لە بەشێکی پەیامەکەیدا اەدر باسی سیمایەکی عێراق ق هاووڵاتیەکانی کردووە، نوسیویەتی،”عێراق دوو سیمای گرنگی تێیدا کۆبووەتەوە، کە بریتین لە سیمای نەتەوایەتی عەرەب لەلای خۆرئاوا و باشوورەوە و شیعە لەلای خۆرهەڵاتەوە، بۆیە لە ئێستادا دووچاری ململانێی عەرەبی سوننی و شیعە بووەتەوە کە هەردووکیان مایەی شانازین بۆ ئێمە”.

هەروەها داوایەک لە دراوسێکانی عێراقیش دەکات و ئاماژەی بەوەکردووە،”  داوا دەکەین عێراق دووربخرێتەوە لەو ململانێیەی کە لەنێوان ئێران و سعودییەدا هەیە، دەبێت پەیوەندی عێراق لەگەڵ ئەو دوو وڵاتە و وڵاتانی دراوسێی لەسەر بنەمای ڕێزگرتنی دراوسێتی و دەستوەرنەدان بێت لە کاروباری ناوخۆ”.

هەروەها ئەوەشی خستووەتەڕوو،”ئێمە دەتوانین ببین بە پردی پەیوەندی لەنێوان ئەو دوو بەرەیەدا، نزیکبوونەوەی ئەو دوو وڵاتەش لەیەکەوە لەبەرژەوندی عێراق و ناوچەکەدایە”.

جەختی لەوەشكردووەتەوە،” ڕێز لە ڕەگ و ریشەی عەرەبی بوونمان و مەزهەبەکەشمان دەگرین و داواش دەکەین هەردوولا دراوسێیەتی باشمان لەگەڵدا بکەن، چونکە نامانەوێت خۆمان بۆ لایەنێک ساغ بکەینەوە لەسەر حسابی لایەنێکی دیکە”.

لە بەشێکی تری پەیامەکەدا سەدر داوایەک لە پێشمەرگە و حەشد دەکات و ڕایگەیاندووە،” ئێمەی عێراقی بەهەموو بیروباوەڕو و بیكردنەوەكانمانەوە و بەتایبەتیش برایانی پێشمەرگە و حەشدی شەعبی كە لە چوارچێوەی هێزەئەمنییەکانی عێراقدان، دەبێت تێڕوانینەكانیان نیشتیمانیانە بێت و ڕێز لە سەروەری و شکۆی دەوڵەت بگرن”.

لەبارەی سەرۆككۆماری نوێی ئێرانیشەوە ڕێبەری ڕەوتی سەدر، بۆچونی وایە کە،” گەیشتنی ڕەئیسی بە دەسەڵات نابێت ببێتە هۆکاری ئەوەی توندڕەوی باڵ بەسەر ناوچەکەدا بکێشێت و ئاڵۆزییەکان زیاتر بکات”.

لە کۆتایدا موقتەدا سەدر داواشی لە ئەمەریکا کردووە، تائەو کاتەی لەعێراق پاشەکشە دەکات ڕێز لە ئیرادەی عێراقییەکان بگرێت و دەست وەرنەداتە هەڵبژاردنەکانی داهاتوو.

بابەتی پەیوەندیدار

Back to top button