تۆمەتبارێك بە بڕێك ماددەی هۆشبەرەوە دەستگیركرا

لڤین:

بەڕێوەبەرایەتی پۆلیسی پارێزگای سلێمانی لە پەڕەی تایبەتی خۆی لە تۆڕی کۆمەڵایەتی فەیس بووک ڕایگەیاند مەفرەزەكانی نوسینگەی رۆژئاوای بەشی پۆلیسی نەهێشتنی تاوانی سلێمانی تۆمەتبارێكیان دەستگیركرد كە چەندین فەرمانی گرتنی هەبووەو لەكاتی دەستگیركردنیشیدا دەستگیراوە بەسەر بڕێك ماددەی هۆشبەر و چەكێك لە جۆری دەمانچە.

لە بەشێکی تری ڕاگەیەندراوەکەدا هاتووە دوای ئەوەی لەلایەن چەند هاوڵاتییەكەوە سكاڵا تۆمار كرا كە دزییان لێكراوە ، پۆلیسی سلێمانی لێكۆڵینەوەكانی دەستپێكردو دوای وەرگرتنی بڕیاری بەڕێز دادوەر توانرا لەلایەن نوسینگەی ڕۆژئاوای بەشی پۆلیسی نەهێشتنی تاوانەوە تۆمەتبار بناسرێتەوەو دەستگیربكرێت و لە كاتی دەستگیركردنیشیدا دەستگیراوە بەسەر بڕێك ماددەی هۆشبەر لە جۆری كریستاڵ و پارچە چەكێكدا لە جۆری دەمانچە .

سەبارەت بە ناسنامەی تۆمەتبارەکە پۆلیس ئاشکرای کردووە تۆمەتبار (س ، ع ، ع ) لەدایكبووی ١٩٨٢ ، دانیشتوی شاری سلێمانی بەبڕیاری بەڕێز دادوەر ڕاگیراوە و لێكۆڵینەوە لە گەڵیدا بەردەوامەو بەرلەدەستگیرکردنیشی ٨ فەرمانی گرتنی هەبووە.

بابەتی پەیوەندیدار

Back to top button