سەرۆکى فراکسیۆنى گۆڕان: لە کوردستان داهاتى زیاد لە خۆى هەیە، بەڵام بەڕێوەبردنێکى ناتەندروستى هەیە

سەرۆکى فراکسیۆنى گۆڕان لە ئەنجومەنى پارێزگاى سلێمانى رایدەگەیەنێت؛ هەرێمى کوردستان داهاتى زیاد لە خۆى هەیە، بەڵام لەبەر ئەوەى بەڕێوەبردنێکى ناتەندروستى هەیە و بەشێکى زۆرى داهاتەکەى لەلایەن دەسەڵاتەوە قۆرخ دەکرێت و بەهەدەر دەدرێت، بۆیە ناتوانرێت ئیدارەى خەڵک و موچەخۆران و دامەزراوەکانى حکومەت بکرێت و دابینکردنى پێداویستى و خزمەتگوزارییەکانى خەڵک لە نزمترین ئاسدایە،

دەشڵێت: ئێستاش دەست بکرێت بە حکومڕانییەکى رەشید، دۆخەکە ئاسایی دەبێتەوە و دەتوانرێت هەمو قەیرانەکان تێپەڕێنرێت.

رێبوار ئەحمەد، سەرۆکى فراکسیۆنى گۆڕان لە ئەنجومەنى پارێزگاى سلێمانى، لە لێدوانێکدا بۆ میدیای حیزبەکەی دەڵێت: باوەڕى تەواومان وایە کە ئەم وڵاتە، وڵاتێکى ئاوەدانە و داهاتى زیاد لە خۆى هەیە، بەڵام لەبەر ئەوەى بەڕێوەبردنێکى ناتەندروستى هەیە، بۆیە ناتوانرێت ئیدارەى خەڵک و موچە خۆران و دامەزراوەکانى حکومەت بکرێت و پێداویستى و خزمەتگوزارییەکانى خەڵک لە ئاو و کارەبا و دەرمان و رێگاوبان و تەنانەت کۆکردنەوەى خاشاک دابین بکرێن.

سەرۆکى فراکسیۆنى گۆڕان لە ئەنجومەنى پارێزگاى سلێمانى ئاماژە بەوە دەکات؛ هۆکارى سەرەکى ئەم دۆخە ئەوەیە دەسەڵات بەشێکى داهاتى ئەم وڵاتە بۆ خۆى قۆرخ دەکات و بە چەندین رێگە داهاتەکان دەبات، دەشڵێت: ئێمە لە فراکسیۆنەکەمان جگە لە نوسرا و و راپۆرت، هەڵوێستى ئاشکرامان هەبوە لەبارەى هۆکارەکانى ئەم دۆخە قەیراناویەى بەرۆکى هاوڵاتیانى کوردستان و پارێزگاى سلێمانى گرتوە و پێمانوایە؛ ئێستاش هێشتا درەنگ نییە و ئەگەر کەسانێکى خاوەن ئەزمون و دڵسۆز و نیشتیمانیى و دادپەروەر حکوم بکەن و ئیدارەدانێکى تەندروست و رەشید لە قازانجى هاوڵاتیان بگیرێتە بەر، دۆخەکە ئاسایی دەبێتەوە و دەتوانرێت هەمو قەیرانەکان تێپەڕێنرێت.

وتیشى: وەک فراکسیۆنى گۆڕان یاداشتمان بۆ بانگهێشتى بەڕێوەبەرى بانکى ناوەندى سلێمانى پێشکەش کردوە، کار بۆ چالاککردنەوەى لیژنەکانى ئەنجومەنى پارێزگاش دەکەین بۆ چاودێرى زیاترى دامەزراوەکانى حکومەت لە سنورى پارێزگاى سلێمانى.