وەزارەتی دەرەوەی ئەمریکا:

ئەگەر ئێران بیەوێت تاوەکو چەند هەفتەی دیکە لەگەڵ ئەو وڵاتە دەگەنە رێککەوتن

لڤین:

بە ئامانجی گەڕاندنەوەی ئەمریکا بۆ رێککەوتننامەی ئەتۆمی کە ساڵی ٢٠١٥ لە نێوان ئێران و وڵاتانی ( ٥+١ ) ئیمزا کرا و دووبارە پابەندبوونی ئێران بە رێککەوتننامەکە، لە سەرەتای مانگی نیسانی ئەمساڵەوە، دانوستانی ئێران و وڵاتانی ( ٤+١ ) لە ڤیەننای پایتەختی نەمسا دەستیپێکردووە و تاوەکو ئێستاش بەردەوامە.

سەبارەت بە ڕێککەوتنی ئێران و ئەمریکا،ئاژانسی هەواڵی رۆیتەرز لەزاری بەرپرسێکی وەزارەتی دەرەوەی ئەمریکا بڵاویکردووەتەوە”پێدەچێت لە چەند هەفتەی داهاتوودا لەسەر گەڕاندنەوەی واشنتن بۆ رێککەوتننامەی ئەتۆمی و دووبارە پابەندبوونی تاران بە رێککەوتننامەکە، لەگەڵ ئێران بگەنە رێککەوتن، بەڵام لە دواجاردا بەدیهێنانی ئەو بابەتە پەیوەندی بە بڕیاری سیاسیی بەرپرسانی ئێرانەوە هەیە”.

ئەو بەرپرسەی وەزارەتی دەرەوەی ئەمریکا کە نەیویستووە ناوی خۆی ئاشکرا بکات، ئاماژەی بەوەیش داوە، ”تاوەکو ئێستاش کەلێن لەنێوان هەڵوێستی ئەمریکا و ئێراندا هەیە و ئەنجامدانی دانوستانی ناڕاستەخۆ لەگەڵ تاران و گەیاندنی پەیامەکان لەڕێی وڵاتانی دیکەوە، دەبێتەهۆی ئەوەی کە هەندێک جار لێکتێنەگەیشتن رووبدات”.

بابەتی پەیوەندیدار

Back to top button