لاھور شێخ جەنگی: سەرۆکی حکومەت لە دۆسیەکەی غالب محەمەد دەست وەردەداتە کاروباری دادگا

لڤین ھاوسەرۆکی یەکێتی ئاشکرای دەکات کە دەست وەردەدرێتە کاروباری دادگا بۆ ئازادکردنی سێ ئەفسەرەکەی پارتی کە لەسەر دۆسیەی ھێرشکردنە سەر غالب محەمەد دەستگیر کرابوون و سەرۆکی حکومەتیش قبوڵی کردووە.

لاهور شێخ جەنگی، هاوسەرۆکی یەکێتیی نیشتیمانیی کوردستان، رایگەیاند: دەستیان داوەتە کاروباری دادگا بۆ ئەوەی ئەو سێ کەسە ئازاد بکرێن و کەیسەکە دیزە بە دەرخونە بکرێت.

ئەو لە پەیامێکدا لە تویتەرەوە راشیگەیاند “بۆیە سەرۆکی حکومەت لێرەوە پێت دەڵێم تۆ بە تەواوەتی متمانەت لەدەستداوە ئەگینا ئەمەت قبوڵ نەدەکرد”.

ئەوەشی بەبیر ھێناوەتەوە “هەر ئەو حکومەتەی کە لە کەیسی دەستگیرکردنی (٥) چالاکوانەکەی بادینان داوای لە هەموو لایەنەکان دەکرد کە دەستوەردان لە کاروباری دادگا نەکەن، کەچی هەمان حکومەت بە ئاشکرا و بە هەڕەشەکردن داوای ئازادکردنی (٣) ئەفسەری دەزگایەکی هەواڵگریی هەرێم دەکات کە لەسەر کەیسی پەلاماردانی پەرلەمانتار غالب محەمەد دەستگیر کراون”.

ھێزە ئەمنیەکانی سلێمانی سێ ئەفسەری سەر بە دەزگای پاراستنی پارتیان دەستگیرکرد کە بەشداربوون لە ھێرشکردنە سەر پەرلەمانتار غالب محەمەد، بەڵام ماوەی دوو رۆژە پارتی لە ھەوڵی بەردەوامدا بووە بۆ ئازادکردنیان.

 

بابەتی پەیوەندیدار

Back to top button