هەپەگە کوژرانی ١٥ سەربازی تورکیای ڕاگەیاند
لڤین:
هەپەگە ڕایگەیاند، لە چالاکییەکانی گەریلاکاندا لە ناوچەکانی زاپ و خواکورک، بەلایەنی کەمەوە ١٥ سەربازی تورکیایان کوشتووە، و ئۆتۆمبێلێکی سەربازییش تێکشکێندراوە.
ئەمڕۆ ناوەندی ڕاگەیاندن و چاپەمەنیی هێزەکانی پاراستنی گەل-هەپەگە ڕاگەیەندراوێکی لەبارەی چالاکییەکانی گەریلا بڵاوکردەوە، کە ڕۆژانی سێ تا شەشی ئەیلول لە ناوچەکانی زاپ و خواکورک ئەنجامیانداوە.
بەگوێرەی ڕاگەیەندراوەکە، لەو چالاکییانەدا بەلایەنی کەمەوە ١٥ سەربازی تورکیا کوژراون و سەربازێکیش بەسەختیی برینداربووە.
ئەوەشی خستووەتەڕوو، کە گەریلاکان ئۆتۆمبێلێکی سەربازیی لە جۆری کریپ و سیستمێکی کامێرای چاودێریی و ٦٠ کیلۆ تەقەمەنییان تەقاندووەتەوە.
لەبارەی هێرشەکانی سوپای تورکیشەوە هەپەگە ڕایگەیاندووە، کە سوپای تورکیا بە بۆمبی ئەتۆمی تاکتیکیی و چەکی کیمیایی، ٢٤ جار بە هێلیکۆپتەری هێرشبەر، ١٢ جار بە فڕۆکەی جەنگیی و دەیان جاریش بۆ تۆپ، هاوەن و چەکی قورس ناوچەکانی بەرخۆدانی بۆردوومان و تۆپباران کردووە.
