چەند موشەكێك ئاراستەی ناوچەی سەوزی بەغداد كران
لڤین: كەمێك لەمەوبەر چەند موشەكێك لە ناوچەی سەوزی بەغداد كەوتنەخوارەوە و باڵیۆزخانەی ئەمریكا لە شارەكە زەنگی ئاگاداركردنەوەی لێداوە.
لەدوای كەوتنە خوارەوەی موشەكەكانیش هێلیكۆپتەری ئەمریكا بە ئاسمانی ناوچەی سەوز و باڵیۆزخانە كەیاندا دەسووڕێنەوە و چاودێریی ناوچەكە دەكەن.
یەکێک لە موشەکەکان لە نزیک بارەگای ئاسایشی نیشتمانی و یەکێکی دیکەیان لە نزیک کۆشکی (سجود) کەوتووە و زیانی بە چەند ئوتۆمبێلێک گەیاندووە.
شانەی راگەیاندنی ئەمنیی عێراق ئاماژەی بەوە كردووە، ژمارەی موشەكەكان دوو موشەك بوون و هیچ زیانێكی لێنەكەوتووەتەوە. هێزە ئەمنییەكانیش بەردەوامن لە لێكۆڵینەوە.
پەیامنێری رووداو لە بەغدا باسی لەوە كرد، بەهۆی ئەو دووكەڵەی بەرزبووەتەوە، ئەمبووڵانس و هێزە ئەمنییەكان بەرەو باڵیۆزخانە چوونە.
بەپێی زانیارییەكانی پەیامنێری رووداو و ئەو وێنانەی بۆ رووداو نێردراون، یەكێك لە مووشەكەكانی ئاراستەی ناوچەی سەوزكراوە بەر گەراجی دەزگای ئاسایشی نیشتمانیی عێراق كەوتووە و زیانی بە چەند ئۆتۆمبێلێك گەیاندووە.
