لەسەر وەستانی پتڕۆدۆلاری چەمچەماڵ سکاڵا ڕادەستی داواکری گشتی کرا

لڤین:

گروپێک لە چالاکوانانی  چەمچەماڵ، دژی ڕاگرتنی پارەی پترۆدۆلار سکاڵای یاساییان لەسەر هەریەک لە کۆمپانیای دانەغاز، وەزارەتی سامانە سروشتییەکان و قائیمقامی چەمچەماڵئاراستەی داواکاری گشتی کرد. 

ئەمڕۆ گروپی ڕا کە پێکهاتوون لە ژمارەیەک چالاکوانی قەزای چەمچەماڵ، لە دادگای چەمچەماڵ سکاڵای یاساییان لەسەر  کۆمپانیای دانەغاز و وەزارەتی سامانە سروشتییەکان و قایمقامی چەمچەماڵ ئاراستەی داواکاری گشتی کرد.

لەبەیاننامەی گروپەکەدا هاتووە: لەکۆتایی ساڵی ٢٠١٦ بڕیار لە دروستکردنی سندوقی پتڕۆدۆلار دراوە، تاکو ١٠ی ئەیلولی ٢٠١٨ دوابڕ خراوەتە سەری، دواتر بەبێ هیچ هۆکارێک ئەو سندووقە وەستێندراوە، تاکو ئێستا ئەو سندوقە وەگەڕنەخراوەتە.

گروپەکە دەشڵێت: پرسیاری ئێمە ئەوەیە هۆکاری وەستاندنی پارەی پتڕۆدۆلار چییە؟ ئەگەر ڕانەوەستاوە پارەی پتڕۆدۆلار دەدرێ بەکێ؟ هەربۆیە سکاڵامان تۆمارکردووە لە کۆمپانیای دانەغاز، چونکە کاری وەبەرهێنان دەکات، دووەم وەزارەتی سامانە سروشتییەکان، چونکە لایەنی جێبەجێکارە، سێیەم قائیمقامی چەمچەماڵ، چونکە سەرۆکی یەکەی ئیداری شارە و ئەندامی سندوقی پتڕۆدۆلارە.