لە ساڵی ڕابردوو 662 کەس بە هۆی ڕووداوی هاتووچۆ گیانیان لەدەستداوە

لە ساڵی رابردوودا 4 هەزار و 119 رووداوی هاتووچۆ لە هەرێمی کوردستان تۆمارکراوە، لە ئەنجامدا 662 کەس گیانیان لەدەستداوە و 7 هەزار و 220 کەسی دیکەش برینداربوون.

ئەسعەد مەلا کەریم، وتەبێژى گشتیی هاتووچۆی هەرێمى کوردستان لە کۆنگرەیەکی رۆژنامەوانیدا ئامارەکانی ساڵی 2021ی خستەڕوو رایگەیاند”لە ساڵی رابردوودا زیاتر لە 122 هەزار ئۆتۆمبێل تۆمار کراون، ئێستا لە هەرێمی کوردستان یەک ملیۆن و 961 ئۆتۆمبێل هەزار هەیە، کە ئەمە بەراورد بە رووبەڕوو ژمارەی دانیشتووان زۆرە”.

وتەبێژى گشتیی هاتووچۆی هەرێمى کوردستان “لە ساڵی رابردوودا زیاتر لە 70 هەزار مۆڵەتی شوفێری دراوە بە هاوڵاتییان، تائێستا بە گشتی زیاتر لە یەک ملیۆن و 900 هەزار مۆڵەت دراوە”.

ئەو وتیشی “لە ساڵی 2021 زیاتر لە 4 هەزار و 119 رووداوی هاتووچۆ تۆمارکراوە، لە ئەنجامدا 662 هاوڵاتی هەرێمی کوردستان بەهۆی رووداوەکانی هاتووچۆ گیانیان لەدەستداوە و 7 هەزار و 220 کەسی دیکەش برینداربوونە، بەراورد بە ساڵی 2020 ژمارەکە زیادیکردووە”.

ئاشکراشیکرد “لەماوەی ساڵی رابردوودا یەک ملیۆن و 850 هەزار سەرپێچی لەلایەن شوفێرانەوە کراوە، داوا دەکەین شوفێران پابەندبن بە رێنماییەکانی هاتووچۆ، چونکە زیانمەندی یەکەم خۆیانن”.