تورکیا کوژرانی سێ سەربازی لە هەرێمی کوردستان ڕاگەیاند

لڤین:

وەزارەتی بەرگری تورکیا کوژرانی سێسەربازی بە فەرمی ڕاگەیاند، بەڵام هەپەگە دەڵێت گەریلاکانمان چونەتە سەر تەرمی هەشت سەربازی تورکیا.

وەزارەتی بەرگری تورکیا لەراگەیەندراوێکدا بڵاویکردەوە، لەهێرشێکدا بۆ سەر سەربازەکانیان سێ سەربازی وڵاتەکەیان  لەو ناوچانەی دەکەونە چوارچێوەی ئۆپەراسیۆنی “چنگی بروسکە”ەوە کوژراون.

لەبارەی ئەو هێرشەوە ئێوارەی دوینێ هێزەکانی پاراستنی گەل(هەپەگە) باڵی سەربازی پەکەکە ڕایگەیاند، لە ئۆپەراسیۆنێکیاندا بۆ سەر سەربازانی تورکیا لە یەک کاتدا و لە پێنج قۆڵەوە هێرشیان کردووە و گەریلاکانیان چونەتە سەر تەرمی هەشت سەرباز.

هەپەگە ئاماژەی بەوەشکردووە، لەو چالاکیەیاندا ژمارەیەکی زۆر چەک و تەقەمەنی دەستی بەسەرداگیرا وە و هێزەکانی ئەوان بێ زیان بوون.

دوای ئەوەش ئەمڕۆ وەزارەتی بەرگری تورکیادا دەڵێت، هێزەکانیان لەبەرام بەر ئەو سێسەربازەیاندا شەش گەریلایان کوشتووە، بەڵام هیچ زانیاریەکی دیکەی ئاشکرا نەکردووە.

هەپەگە لە ڕاگەیەندراوەکەیدا وتبووی هێرشەکەیان بۆسەر سەربازانی تورک لە ناوچەی زاپ بووە و لە ماوەیەکی زۆر کورتدا توانیویانە زیانێکی زۆریان لێ بدەن.

لە ٢٣ی نیسانی ئەمساڵدا، سوپای تورکیا ئۆپەراسیۆنێکی سەربازیی لە ناوچەکانی هەرێمی کوردستان بەمەبەستی رووبەڕووبوونەوەی گەریلاکانی پەکەکە دەست پێکرد و تا ئێستا بەردەوامە، لە ماوەی ڕابردووش پەکەکە کشانەوەی سوپای تورکیای لە چەند ناوچەیەک ڕاگەیاند وئاماژەی بەوەشکرد کە تورکیا لەبەرامبەر گەریلاکاندا چەکی کیمیایی بەکار دەهێنێت.