مەسرور بارزانی و وەزیرێکی ئەڵمانی باسیان لە دۆخی کۆچبەران کرد

لڤین:

وەزیری دەوڵەت لە وەزارەتی دەرەوەی ئەڵمانیا لەگەڵ سەرۆکى حکومەتی هەرێم لە بەحرەین کۆبونەوە و باسیان لە دۆخی کۆچبەرانی بیلاروسیا کرد. 

مەسرور بارزانی، سەرۆکی حکومەتی هەرێمی کوردستان لەگەڵ میگێل بێرگەر، وەزیری دەوڵەت لە وەزارەتی دەرەوەی ئەڵمانیا کۆبووەوە.

بەپێی ڕاگەیەنراوی کۆبوونەوەکە، گفتوگۆ دەربارەی پەرەپێدانی پەیوەندییەکانی ئەڵمانیا و هەرێمی کوردستان و دۆخی کۆچبەران لە سەر سنوری بیلاڕوسیا و پۆڵەندا کرا.

بە گوێڕەی ڕاگەیەندراوەکە  “وەزیری دەوڵەتی ئەڵمانیا سوپاسی حکومەتی هەرێمی کوردستانی کرد بۆ ئەو ڕێکارانەی گرتوویەتەبەر لە بەرامبەر ئەوانەی بازرگانی بە مرۆڤەوە دەکەن و ڕێگریکردن لە کۆچکردنی نایاسایی و کارئاسانیکردن بۆ گەڕانەوەی ئارەزوومەندانەی کۆچبەران بۆ هەرێمی کوردستان.”

سەرۆکی حکومەتی هەریمیش ئاماژەی بەوەدا کە هەرێمی کوردستان پێشوازی لە هەر هاریکاریی و هەماهەنگییەک لە گەڵ وڵاتانی یەکێتی ئەوروپا دەکات بۆ بەهاناوەچوون و چارەسەرکردنی کێشەی کۆچبەرانی سنوری بیلاروسیا و پۆڵەندا.

 

بابەتی پەیوەندیدار

Back to top button