مەزڵوم عەبدی داوایەک لە هاوپەیمانی نێودەوڵەتی دەکات
لڤین:
فەرماندەی گشتی هێزەکانی سوریای دیموکراتی رایگەیاند، داوا لەهاوپەیمانیەتی نێودەوڵەتی دەکەن هاوکار بێت لەدابینکردنی خزمەتگوزارییە سەرەتاییەکان و گەشەپێدانی ئابوری ناوچە ئازادکراوەکان.
مەزڵوم عەبدی، فەرماندەی گشتی هێزەکانی سوریای دیموکراتی (هەسەدە) لە تویتەری خۆی بڵاویکردەوە، ئەمڕۆ هاوپەیمانی دژی داعش کۆدەبێتەوه بۆ گفتوگۆکردن لەبارەی پێشکەوتن و قۆناغەکانی دیکەی روبەڕوبونەوەی داعش بۆ مسۆگەرکردنی سەرکەوتنی بەردەوام.
لەو پەیامەیدا کە بە زمانی ئینگلیزی بڵاوی کردووەتەوە دەشڵێت، لەگەڵ هاوپەیمانیەتییەکە کار دەکەن بۆ گەڕانەوەی ئەو دەیان هەزار ژن و منداڵ و چەکدارانەی داعش کە لە ناوچەکەدان بۆ وڵاتەکانی خۆیان.
فەورماندەی گشتی هەسەدە داواشی کردووە هاوپەیمانی نێودەوڵەتی پاڵپشتی سەقامگیری و بوژانەوەی ئابوری لە ناوچە ئازادکراوەکان بکات.
ئەمڕۆ لە رۆمای پایتەختی ئیتاڵیا، هاوپەیمانیی نێودەوڵەتیی دژی داعش بە بەشداری وەزیرانی دەرەوەی 83 وڵاتی ئەندامی هاوپەیمانییەکە باس لە کارەکانی هاوپەیمانێتیەکە دەکات.
