سوپاسی پشتیوانییەكانی لاهور شێخ جەنگی بۆ چارەسەركردنی كێشەكانی نەخۆشخانەی هیوا دەكرێت

لڤین:

پارێزگاری سلێمانی سوپاسی پشتیوانیەکانی لاهور شێخ جەنگی دەکات بۆ چارەسەر کردنی کێشەکانی نەخۆشخانەی هیوا

د. هەڤاڵ ئەبو بەكر پارێزگاری سلێمانی لە راگەیەندراوێكدا ئاشكرایكردوە،”  ئەمڕۆ ( شەممە، ١٩ی حوزەیرانی ٢٠٢١ )  بۆ بەدواداچونی چارەسەركردنی كێشەكانی نەخۆشخانەی ( هیوا ) سەردانی نەخۆشخانەی هیوامانكرد و پشتیوانیی خۆمانمان وەك هەمیشە بۆ داواكارییەكانیان دەربڕی، سوپاسی خۆمان گەیاندە بەڕێوەبەرو پزیشك و پەرستیارو كارمەندانی تەندروستیی نەخۆشخانەكە و دڵنیایماندایە نەخۆشەبەڕێزەكان كە هەمیشە لە خزمەتیاندادەبین.”

وتیشی، دواتر پێشوازیمانكرد لە لاهور شێخ جەنگی هاوسەرۆكی یەكێتیی نیشتمانیی كوردستان و وەفدی هاوڕێی، لە نزیكەوە گفتوگۆمان لەگەڵ لایەنە پەیوەندیدارە تەندروستییەكان كرد بۆ چارەسەركردنی كێشەكان و سوپاسی پشتیوانییەكانی هاوسەرۆكی یەكێتیمانكردو هەوڵەكانی حكومەتی هەرێمی كوردستان و وەزارەتە پەیوەندیدارەكان لە چارەسەركردنیاندا نرخێندران.

باسی لەوەشكردوە، دواتر ڕاستەوخۆ پەیوەندیمان وەزیری دارایی و ئابوریی و تەندروستیی و سەرۆكایەتیی دیوانی سەرۆكایەتیی ئەنجومەنی وەزیرانەوە كردو دڵنیایانكردینەوە لە هەوڵە بەردەوامەكانیان و ئومێددەكەین لە ڕۆژانی داهاتودا بەشێكی زۆری كێشەكان چارەسەربكرێن.

شەوی ڕابردویش وەك پارێزگاری سلێمانی پەیوەندیمان بە دكتۆر بەرهەم ساڵح سەرۆككۆماری عیراق و چەندین لایەنی پەیوەندیداری حكومەتی ئیتیحادییەوە كردو ئەمڕۆ سەرۆككۆماری عیراق دڵنیایكردینەوە كە هەموو ڕێكارێكی یاسایی پێویست بۆ پشتیوانیكردنی كەرتی تەندروستیی و بە تایبەتیی نەخۆشخانەكانی چارەسەركردنی شێرپەنجە بە نەخۆشخانەی هیوایشەوە دەگرنەبەر.