بۆ تەملیککردنی یەکە نیشتەجێبوونەکان نابێت پارە لە هاوڵاتی وەربگیرێت
لڤین:
ئەو یەکە نیشتەجیبووانەی لەلایەن کۆمپانیای بەڕێزەوە دروستکراون و نەخشەیان گۆڕاوە یان پارێزەریان دەویت بۆ تەملیک کردن ناچار ناکرێن بۆ ئەوەی کە پارەیان لێوەربگیرێت لەلایەن پارێزەر یان کۆمپانیایەکی دیاریکراوەوە.
ڕەمەزان نامیق کەریم، سەرۆکی لیژنەی پلان و پڕۆژەکان لە ئەنجومەنی پارێزگای سلێمانی سەبارەت بە پرۆژەی یەکەی نیشتەجێ بوونی (گرین سیتی) و هاوشێوەکانی کە لەئیستادا تەملیک دەکرێن رایگەیاند: هیچ کۆمپانیایەک ناتوانێت خاوەن یەکەکان ناچار بکات بەپێدانی بڕێک پارە لەبری پارێزەر و نەخشەی نوێ لەنووسینگەیەکی دیاریکراو …
سەرۆکی لیژنەکە راشیگەیاند: هاوڵاتی سەرپشکە خۆی کاروباری تەملیککردنی یەکەکەی بەجێ دەگەیەنێت بە بێ پارێزەر یاخود خۆی پاریزەر بگرێت.
لەگەڵ بڵاوکردنەوەی ئەو راگەیەندراوەدا هاوپێچی نوسراوی ئەنجومەن بۆ کۆمپانیای بەڕیز و دەستەی بەوەبەرهێنەران و وەڵامی کۆمپانیاکە و دەستەی وەبەرهێنەرانیشی تیادایە کە رەتی دەکەنەوە ئەو کارەیان کردبێت.
رەمەزان نامیق دەشڵێت: هاوڵاتی ئەگەر گۆرانکاری لە خانووەکەیدا کردووە و نەخشەی نوێی پێویستە لەهەر جێگایەک نەخشەکە ئامادە دەکات سەرپشکە و کۆمپانیا بۆی نیە نووسینگەیەکی دیاریکراو دیاری بکات بۆ ئەو مەبەستە..
ئەوەشی ئاشکراکردووە کە، هەندێک هاوڵاتی پەیوەندیان پیوەکردوون کە بری 800 دۆلاریان لەلایەن وەبەرهێنەرەوە بۆ ئەو دوو مەبەستە لێ وەردەگیرێت .
بەگوێرەی یەکێک لە نوسراوەکان کە کۆمپانیای بەرێز وەڵامی دەستی وەبەرهێنەرانی داوەتەوە دەڵێت: بەشداربوان سەرپشککراون بۆ ئەوەی خۆیان کارەکانیان رایی بکەن یان بیدەن بە کۆمپانیای راوێژکاری یاسایی میزان عەدالە.
