قوباد تاڵەبانی: ئەرکی هەموومانە بەرپرسانە ڕوبەری بەکارهێنانی زمانی کوردی فراوان بکەین

لڤین:

جێگری سه‌رۆكی ئەنجومەنی وه‌زیرانی هه‌رێمی كوردستان له‌ رۆژی جیهانیی زمانی دایک رایگه‌یاند، ‎ئەرکی هەموانە، هەم حکومەت و هەم تاک بە تاکی هاوڵاتییان، بەرپرسانە مامەڵە لەگەڵ زمانی کوردیدا بکەن؛ ڕوبەرەکانی بەکارهێنانی فراوانتر بکەن.

قوباد تاڵه‌بانی له‌ په‌یامێكدا رایگه‌یاند “‎تەواوی شۆڕشەکانی نەتەوەکەمان، لەپێناوی ئەوەدا بوون کە بوونێکی سەربەخۆ و ئازادانەمان هەبێت، ویستوومانە بە ناسنامە و تایبەتمەندیی خۆمانەوە بناسرێینەوە، نەک هی نەتەوەیەکی تری سەردەست، لە دیارترینیشیان، زمانەکەمانە”.

ئاماژه‌ی به‌وه‌شكرد “‎ئێمە بەرگریمان لە زمانی کوردی کردووە و ئەویش بەرگریی لێ کردووین، چونکە ئەگەر ئەم زمانە نەبوایە، نەماندەتوانی بەردەوامی بە خەباتی نەتەوەییمان بدەین و هەر هەوڵێکیش بۆ پێشخستنی دۆزی نەتەوەییمان، بەبێ گرنگیدان بە زمانی کوردی، بێئەنجام دەبێت”.

قوباد تاڵه‌بانی ده‌ڵێت “‎ئێمەی کورد، هەتا زمانەکەمان پارێزراوتر بێت، ئەوا باشتر دەتوانین پارێزگاری لە شوناسی کوردبوونمان بکەین و دەشتوانین دەستکەوتی گەورەتر و شایستەتر بەدەست بهێنین، ‎ئەرکی هەموومانە، هەم حکومەت و هەم تاک بە تاکی هاوڵاتییان، بەرپرسانە مامەڵە لەگەڵ زمانی کوردیدا بکەین؛ ڕووبەرەکانی بەکارهێنانی فراوانتر بکەین و ڕۆژ لەدوای ڕۆژ بەهێزتری بکەین”.