یونسێف لەسەر منداڵانی داعش لە ڕۆژئاوا داوایەکی بەپەلە دەکات
ڕێکخراوی یونسێفی سەر بەنەتەوەیەکگرتوەکان په‌یامێك ئاراسته‌ى هه‌سه‌ده دەکات و ڕه‌خنه‌لە وڵاتانى ڕۆژئاوا دەگرێت بە هۆی ئەوەی تائێستا ئه‌و داعشه منداڵانه‌یان وه‌رنه‌گرتۆته‌وه كه له‌گرتوخانه‌كانى ڕۆژئاواى كوردستانن.
ڤیکتۆر نیلاند نوێنەری ڕێکخراوی یونسێفی سەر بە نەتەوەیەکگرتووەکان لەسوریا ڕایگەیاند “توندوتیژییە توندەکانی شاری حەسەکە پەیوەست بەهەڵکوتانەسەر گرتوخانەی سناعەی شارەکە له‌لایه‌ن داعشه‌وه لەماوەی هەفتەی ڕابردودا، نزیکەی 850 منداڵی دەستگیرکراوی خستۆتە مەترسیی ڕاستەقینەوە، کە هەندێکیان تەمەنیان لە12 ساڵ زیاتر نییە”.
بەرپرسەکەی یونسێف وتوشیەتی، نزیکەی 10 هەزار منداڵ‌و دایکیان لەناوەندو سەربازگەکانی دەستبەسەرکردنی هێزەکانی سوریای دیموکراتدان کە لەزیاتر لە60 وڵاتی جیاوازەوە هاتون‌و ئێستاش لەدۆخێکی نالەبارو زستانێکی سەختدان.
ئەوەشی وتووە “یونسێف داوا لەسەرجەم لایەنەکانی باکورو ڕۆژهەڵاتی سوریاو هەموو جێگاکانی سوریا دەکات منداڵان لەمه‌ترسیه‌كانى جه‌نگ‌و ئازارپێگەیاندن دوربخەنەوەو لەهەموکات و دۆخێکدا پارێزگاریان لێبکەن”.
داوای لەوڵاتانی ئەندام‌و پەیوەندیدار بەو پرسە کردوە کە جوڵەی بەپەلە بکەن‌و بەرپرسیارێتیی گێرانەوەی ئەو منداڵانەو دایکەکانیان لەئەستۆ بگرن.
