ساڵح موسلیم: ئەو كەسانەی كە بۆ ناوچەی گەریلا رەوانە دەكرێن پێشمەرگە نین

 لڤین:

ئەندامی دەستەی هاوسەرۆكایەتیی پارتی یەكێتی دیموكرات پەیەدە، رایگەیاند، پارتی گەمەیەکی مەترسیدار دەکات کە دژی پارتی خۆشیەتی و دەڵێت لە شەڕی ناوخۆدا پارتی خۆی زەرەر دەکات.

 ساڵح موسلیم لە دیدارێكدا لەگەڵ ئاژانسی فورات نیوز، رایگەیاند “دەوڵەتی تورك تەنها هێرش ناكاتە سەر كوردانی باكور یان پەكەكە، كاتێك هێرش دەكات لە دژی هەموو گەلی كورد شەڕ دەكات. بۆیەش ئەوانەی هاوكاری دەوڵەتی تورك دەكەن، دواتر دژی هەموو گەلی كورد شەڕ دەكەن.”

ئەو سەرکردەیەیە پەیەدە دەشڵێت “لەناو پارتیدا هەندێك لایەن هەیە، ئیرادەی خۆیان تەسلیم كردوە بۆ جێبەجێكردنی پلانەكانی دەوڵەتی تورك. ئەوەندەی ئێمە چاودێری دەكەین، ئەو كەسانەی كە بۆ ناوچەی گەریلا رەوانە دەكرێن پێشمەرگە نین، ئەوان بە شێوەیەكی سەرەكی هێزی تایبەتی پارتین. بۆیە یارییەكی زۆر مەترسیدار دەكرێت”.

ئەو ئەو کارەی پارتی بە گەمەیەكی مەترسیدار بەرامبەر بە كورد  ناو دەهێنێت و دەڵێت لە دژی خودی پارتیشە و “پارتی بەم شەڕە لقەكەی ژێر پێی خۆی دەبڕێتەوە.”

ئەوەشی وتوە ئەگەر بەڕاستی شەڕی ناوخۆ دەست پێبكات، “پێش هەموو شتێك پارتی زیانی بەردەكەوێت. ئەوانەی لەناو پارتیدان زیانیان بەردەكەوێت. بۆیە لەبەر ئەوەی ئەوان برای ئێمەن، باوەڕم وایە زۆر باش دەبێت ئەگەر لەو هەڵەیە بگەڕێنەوە.”