قائیمقامیەتی سلێمانی ئامادەکاریەکانی لیژنەی ئەمنی بۆ رۆژانی جەژن راگەیاند
لڤین:
قائیمقامی سلێمانی رایگه‌یاند، لە رۆژانی جەژندا کوشتارگەکان کراوە دەبن و تیمەکانی تەندروستی چاودێری و پشکنین بۆ ئاژەڵەکان ده‌كه‌ن.
لیژنەی ئەمنی قەزای مەڵبەندی سلێمانی و بەشێک لە فەرمانگە خزمەتگوزارییەکانی سلێمانی دوای کۆبونەوەیان بۆ ئاماده‌كارییه‌كانی رۆژانی جه‌ژنی قوربان دواتر له كۆنگره‌یه‌كی رۆژنامه‌وانیدا قائیمقامی سلێمانی ئاماده‌كارییه‌كانی ئاشکرا کرد.
ئاوات محه‌مه‌د، قائیمقامی سلێمانی رایگەیاند: بۆ پاراستنی هاوڵاتیان، لیژنەی ئەمنی و فریاگوزاری و تەندروستی هێزە ئەمنییەکان لە نزیک گۆڕستانەکانی سلێمانی و شوێنە گشتیەکان و سەیرانگاکان بڵاودەبنەوە و لەرۆژانی جەژن و دوای جەژنیش، بەو هیوایەی روداوەکان کەم بکرێتەوە.
قائیمقامی سلێمانی وتیشی: لە هەموو شوێنەکانی ئاژەڵفرۆشی تیمەکانی تەندروستی ئامادەدەبن تا بەشێوەیەکی تەندروست قوربانیكردنه‌كان بەڕێوەبچێت، هەموو لایەک ئەبێت هاوکار بین بۆجێبەجێکردنی سەرجەم رێکارەکان.
هەر لە کۆنگرەکەدا ئەوەش راگەیەندرا کوشتارگەکان کراوە دەبن لە رۆژانی جەژندا و پزیشکانی ڤێتنەری لەو کوشتارگانە ئامادە دەبن بۆ پشکنینی ئاژەڵەکان.
