وەزارەتی پەروەردە چەند داواكارییەكی خوێندكارانی قۆناغی 12ی ئامادەیی جێبەجێكرد
لڤین
نوێنەری ژمارەیەك لە خوێندكارانی قۆناغی 12ی ئامادەیی لەگەڵ وەزیری پەروەردەی هەرێم كۆبوونەوە و لە كۆنگرەیەكی رۆژنامەوانیدا رایانگەیاند، چەند داواكارییەكی خوێندكارانی قۆناغی 12ی ئامادەیی جێبەجێكران.
لە كۆنگرەیەكی رۆژنامەوانیدا نوێنەری خوێندكارانی قۆناغی 12ی ئامادەیی لە شاری سلێمانی رایانگەیاند، ئەمڕۆ پێنجشەممە، لە شاری هەولێر لەگەڵ وەزیری پەروەردەی هەرێم كۆبوونەتەوە و داوایانكردووە ماوەی خوێندنیان بۆ درێژبكرێتەوە و پڕۆگرامی خوێندن كەمبكرێتەوە و كاتی تاقیكردنەوەكانی قۆناغی 12ی ئامادەیی بخرێتە مانگی تەمموز و لە كۆتایی ساڵدا هەفتانە دوو تاقیكردنەوە ئەنجامبدرێت.
ئاماژەیان بۆ ئەوەش كرد “رەزامەندی لەسەر داواكاریەكانیان دراون جگەلە كەمكردنەوەی پڕۆگرامی خوێندن كە وەزیری پەروەردە رایگەیاندووە ئەو داوایە زیان بە خوێندكاران دەگەیەنێت”.
