لڤین
وەزارەتی دەرەوەی ئێران، سەرکۆنەی سزا نوێیەکانی ئەمریکای بۆسەر دامەزراوەکانی وڵاتەکەی کرد و رایگەیاند، ئەو سزا نوێیانە، پێچەوانەی رەوتی دیپلۆماسیەت و دانوستانەکانن.
لە نوێترین هەنگاویدا رۆژی چواشەممە، 30ی نیسان، وەزارەتی خەزێنە و دەرەوەی ئەمریکا سزای نوێی بەسەر 7 کۆمپانیای فرۆشی نەوتی ئێران، ژمارەیەک دامەزراوەی پێترۆکیمیایی ئەو وڵاتەدا سەپاند.
مارکۆ روبیۆ، وەزیری دەرەوەی ئەمریکا رایگەیاند، ئێران سود لە داهاتی نەوت و پێترۆکیمیاییەکان بۆ پاڵپشتی لە گرووپە چەکدارەکان و تێکدانی ئاسایشی ناوچەکە وەردەگرێت.
ئیسماعیل بەقائی، گوتەبێژی وەزارەتی دەرەوەی ئێران ئەمڕۆ پێنجشەممە رایگەیاند، سزاکانی ئەمریکا بۆسەر دامەزراوە یاساییەکانی ئێران و گەمارۆ خستنەسەر خەڵکی ئێران، پێچەوانەی یاسا و بنەما نێودەوڵەتییەکانە.
بەقائی دەشڵێت، سەپاندنی سزاکان لەکاتێدایە، رەوتی دانوستانەکان بۆ گەیشتن بەرێککەوتن بەردەوامە، بەڵام ئەم هەنگاوانەی واشنتن دژی گفتوگۆکان و رێڕەویی دیپلۆماسین.
گوتەبێژی وەزارەتی دەرەوەی ئێران هەنگاوەکەی ئەمریکا بە تیرۆری ئابووری ناو دەبات و دەشڵێت، لەکاتێدایە بڕیارە لە چەند رۆژی داهاتوو خولێکی نوێی دانوستانەکان بەڕێوەبچێت.
گوتەبێژی وەزارەتی دەرەوەی ئێران گوتیشی، ئەمریکا بەرپرسیاریەتیی هەنگاوەکانی دژبە خەڵکی ئێران هەڵدەگرێت.
