لڤین
کۆنفرانسی یەکڕیزی و یەکهەڵوێستیی کورد لە رۆژئاواى کوردستان کۆتاییهات و لە ئەنجامنامەی کۆتایی کۆنفرانسەکەدا دیدگای هاوبەشی کورد پەسەندکرا و بڕیاردرا شاندێکى هاوبەشی کورد دروستبکرێت بۆ کارکردن لەسەر بنەمای جێبەجێکردنی دیدگا پەسەندکراوەکە.
فۆزا یوسف، ئەندامی دەستەی سەرۆکایەتیی پەیەدە، ئەنجامنامەی کۆتایی کۆنفرانسی خوێندەوە و گوتی؛ قۆناغی ئێستا، بنیادنانی دیدێکی سیاسی هاوبەشی کوردە بۆ چارەسەری دادپەروەرانەی کێشەی کورد لە سووریا، وەک دەوڵەتێکی دیموکراسی و لامەرکەزی.
ئاماژەی بەوەشکرد، لە کۆنفرانسەکەی ئەمڕۆدا کە زیاتر لە 400 کەسایەتی و پارت و لایەنی سیاسی بەشداربوون، دیدگای هاوبەشی کورد وەک “بەڵگەنامەیەکی دامەزرێنەر کە گوزارشت لە ئیرادەیەکی کۆدەنگی، پێکەوەیی دەکات بۆ چارەسەرێکی دادپەروەرانە و هەمەلایەنە بۆ پرسی کورد لە چوارچێوەی سووریایەکی یەکگرتوو”، پەسەندکرا.
گوتیشى، دیدگاکە پارێزگاری لە پرسی کورد، ئازادی، مافەکانی ژنان دەکات و رێگەیان پێدەدات بەشداریی لە دامەزراوە سیاسی و کۆمەڵایەتی و سەربازییەکان دا بکەن.
ئەوەشهاتووە، “دیدگا هاوبەشەکە دەبێتە بنەمایەک بۆ گفتوگۆی نەتەوەیی، لەنێوان هێزە سیاسییە کوردییەکان و ئیدارەی نوێی دیمەشق و هەموو هێزە نەتەوەییەکانی دیکەی سووریا”.
لەبەشێکی دیکەی ئەنجامنامەی کۆنفرانسەکەدا بڕیاردرا شاندێکى هاوبەشی کورد دروستبکرێت بۆ کارکردن لەسەر بنەمای جێبەجێکردنی دیدگا پەسەندکراوەکە و ئەو شاندە هاوبەشە کوردییە، دانوستان و دیالۆگ لەگەڵ لایەنە پەیوەندیدارەکاندا دەکات.
