لڤین
لەدوای ئەو زریان و لافاوەی لە ماوەی دوو رۆژی رابردوودا وڵاتی ئیسپانیای گرتەوە شەپۆلێکی بارانبارینی بەخوڕ وڵاتی نەرویجی گرتەوە.
میدیاکانی نەرویج بڵاویانکردوە، بەهۆی ئەو بارانی بەخوڕەی شەوی رابردوو بەشێک لە وڵاتەکەی گرتەوە لافاو دروستبوو و لە ئەنجامیشدا لە ناوچەکانی باشووری رۆژئاوای نەرویج زیانی زۆریان بەرکەوت و چەند حاڵەتێکی رووخانی پرد و داڕمانی زەوی تۆمارکراون.
ئاشکراشیکرد، تا ئێستا هیچ ئامارێکی زیانی گیانیی تۆمارنەکراوە، بەڵام زیانە ماددییەکان زۆرن و دۆخی ناوچەکە کارەساتبارە.
یەکێک لە شارۆچکەکانی بیرگن کە ژمارەی دانیشتووانەکەی زیاتر لە پێنج هەزار کەسە، سەرجەم ئەو رێگایانەی دەچنەوە سەری داخران و یەکێک لە پردەکانی ناوچەکەش رووخاوە.
ماوەی دوو رۆژە شەپۆلێکی چڕی بارانبارین بەشێک لە وڵاتانی ئەوروپای گرتووەتەوە بە تایبەت ئیسپانیا کە دەیان کەس گیانیان لەدەستداوە و بێسەروشوێن بوون.
