لڤین
لە سنووری ناحیەی بەرزنجە پۆلیسی دارستان چوار کورەی دروستکردنی خەڵوزیان دۆزیوەتەوە کە بەکارهێنراون بۆ سوتاندنی داری تەڕ، هەر چوار کورەکە تێکدران و گەڕان بەدوای خاوەنەکانیان دەستیپێکرد.
ئەمڕۆ هەینی 23.8.2024، پۆلیسی دارستان و ژینگەی سلێمانی رایگەیاند، دوای وەرگرتنی زانیاری و لەئەنجامی دەرچوونی مەفرەزەیەکی بنکەی پۆلیسی دارستانی بەرزنجە بۆ سنوری گوندی حاجی مامەند توانیان چوار کورەی خەڵوز تێکبدەن.
کورەکان بەکاردەهاتن بۆ سووتاندنی داری تەڕ و دروستکردنی خەڵوز، پۆلیسی دارستان و ژینگەی سلێمانی وا دەڵێت.
لەکاتی تێکدانی کورەکاندا “دەستگیرا بەسەر ژمارەیەک داری تەڕی بڕدراوە کە ئامادە دەکرا بۆ دروست کردنی خەڵوز”.
“پەڕاوی لێکۆڵینەوە بۆ دۆسیەکە کراوەتەوە بۆ وەرگرتنی رێکاری یاسایی و دۆزینەوەی خاوەنی کورە خەڵوزەکان”، پۆلیسی دارستان وا دەڵێت.
