لڤین
ئەمڕۆ پێنج شەممە مەكتەبی سیاسی یەكگرتووی ئیسلامی كوردستان كۆبوونەوەی ئاسایی خۆیی ئەنجامدا و لەڕاگەیەندراوێکدا دەڵێت، سەلاحەدین محەممەد بەهادین ئەمینداری گشتی یەكگرتوو دوا گۆرانكاری و پێشهاتەكانی هەرێم و عێراق و ناوچەكەی شی كردەوە بەتایبەتی ئەو گۆڕانکارییە گەورەی لە سوریادا روویدا پاش رووخانی رژێمی ستەمکاری پێشوو.
ئەمینداری یەکگرتوو دەڵێت، پەیوەندیەكانمان دەخەینە خزمەتی چارەسەرکردن و چەسپاندنی مافی گەلەکەمان لە رۆژئاوا و درێژەدان بە هەوڵەکانمان لە پرۆسەی ئاشتی لە تورکیا و بەرقەراركردنی ئاسایش و ئارامی هەرێم و ناوچەكە و بەدەستهێنانی مافە رەواكانی گەلی كورد ، لەو پێناوەشدا یەکگرتوو چی لە توانایدا بێت درێغی ناکات .
مەكتەبی سیاسی یەكگرتوو جەختی كردەوە لەوەی كە هەرچی زووترە دەستەی سەرۆكایەتی پەرلەمانی كوردستان پێكبهێنرێت و پەرلەمان كارا بكرێـت و رۆڵی گرنگی خۆی ببینێ، هەروەها تەئكیدكرایەوە لەوەی كە یەكگرتوو لە كابینەی نوێی حكومەت بەشدار نابێت و درێژەدەدا بە رۆڵی ئۆپۆزسیۆنی خۆی لە پەرلەمانی كوردستان.
