لڤین
وەزارەتی کارەبای عێراق رایگەیاند، داوا لە تاران کراوە تا لە تورکمانستانەوە غاز هاوردە بکەین.
ئەمڕۆ پینجشەممە ٩ـی کانونی دووەمـی ٢٠٢٥، وەزارەتی کارەبای عێراق رایگەیاند، ئێران رەزامەندی نیشان داوە بڕی ٦٢٥ مێگاوات کارەبا بداتەوە عێراق. دەشڵێت، داوایان لە تاران کردووە ئاسانکارییان بۆ بکات لە تورکمانستانەوە بە خاکی ئێراندا غاز هاوردە بکەن.
ئاماژە بەوەش کراوە، ئەو بڕە کارەبایەی ئێران دەیداتەوە بە عێراق لەو هەزار و ٢٠٠ مێگاواتەیە کە ماوەی زیاتر لە مانگێکە ئێران بڕیویەتی.
ئەوەش خراوەتەڕوو، لە هەوڵدان کە گرێبەستی غازی نێوان عێراق و ئێران جێبەجێ بکەن و لایەنی ئێرانیش بەڵێنیان داوە کە پابەندی مەرجەکانی رێککەوتنەکە بن.
باس لەوەشکراوە، داوایان لە بەرپرسانی ئێران کردووە کە ئاسانکاریی بۆ عێراق بکەن تا لە تورکمانستانەوە بە خاکی ئێراندا غازی سرووشتی هاوردە بکەن، بەوپێیەی بۆ وەرزی هاوین، نیازیان ئەو غازە بۆ بەرهەمهێنانی کارەبا بەکاربهێنن.
