لڤین
مەكتەبی سیاسی یەکێتیی نیشتیمانی کوردستان رایگەیاند، پابەندێتی خۆیان بە سیاسەتی ڕاستکردنەوەی رێڕەوی حوکمڕانی دووپاتدەکەینەوە، دەشڵێت “هیوامان وایە ساڵی ٢٠٢٥ کۆتایهاتنی قەیرانی مووچە بێت”.
لەمیانی راگەیەندراوێکدا مەکتەبی سیاسی یەکێتیی هیواخوازە ساڵی نوێ ساڵی ئاشتی و ئاوەدانی، ماف و دادپەروەری و چارەسەری ڕەوای دۆزی کورد لە رۆژهەڵاتی ناوەڕاست بێت لەسەروبەندی گۆڕانکاری ناوچەکە، بە دیالۆگی سیاسیی و ئاشتی و دیموکراتی.
لەبارەی مووچەشەوە یەکێتی رایگەیاندووە “هیوادارین ساڵی نوێ بۆ کۆمەڵانی خەڵکی کوردستانیش ساڵی بەدیهاتنی ژیان و گوزەرانی باشتر و تێپەڕاندنی دژواری و قەیرانەکانی نێوان هەرێمی کوردستان و بەغدا بێت بە تایبەتی مافی مووچە بەگوێرەی بڕیارەکانی دادگای فیدراڵی، دوور لە تێکەڵکردنی بە دۆسییە سیاسییەکان”.
ئەوەش خراوەتە روو، پابەندێتی خۆیان بە سیاسەتی ڕاستکردنەوەی رێڕەوی حوکمڕانی و گێرانەوەی هاوسەنگی هێز بۆ ئەزموونەکەیان، هەروەک بەڵێنی بە خەڵکەکەیان دابوو، دووپات دەکاتەوە و “لە هەموو وێستگەکانی ساڵی ٢٠٢٥یشدا کۆششی ڕەوای بۆ دەکات، بەرەو حوکمڕانی و حکومەتێکی نوێی خزمەتگوزار و بەرپرس و پرۆسەیەکی سیاسیی کارا و دیموکرات و دەربەست”.
جەختیشیکردووەتەوە، هیوایان وایە ساڵی ٢٠٢٥ ساڵی گەشەی زیاتری پرۆسەی دیموکراتی وڵاتەکەیان و ساڵی دابینکردنی “ئیستحقاقە” دەستورییەکانی تری کورد بێت.
لەکۆتایشدا نوسیویەتی “جارێکی تر پیرۆزە “.
