لڤین
محەمەد شیاع سودانی، سەرۆکوەزیرانی عێراق رایگەیاند، کوشتنی حەسەن نەسروڵا، پێشێلکردن و دەستدرێژییە بۆ سەر هێڵە سوورەکان، جەختیشیکردەوە لە هەڵوێستی جێگیری عێراق سەبارەت بە لوبنان و فەڵەستین.
نووسینگەی سودانی لە راگەیەندراوێکدا دەڵێت، کردەوە تاوانکارییەکەی دوێنێی ئیسرائیل لە باشووری لوبنان، دەرخستنی خواستی ئیسرائیلە بۆ فراوانبوونی ململانێکە لەسەر گیانی گەلان و ئاسایش و ئارامیی ناوچەکە.
لەبەشێکی دیکەی راگەیەندراوەکەدا سەرۆکوەزیرانی عێراق روونیکردووەتەوە، ئەرکی وڵاتانی زلهێزی ئەندامی ئەنجوومەنی ئاسایش و رێکخراوە نێودەوڵەتییەکان و وڵاتانی خاوەن هەژموونە، بەرپەرچی دەستدرێژییەکانی ئیسرائیل بدەنەوە.
سەرۆکوەزیرانی عێراق دووپاتیکردەوە، وڵاتەکەی بەردەوام دەبێت لە هەڵوێستی خۆی و لە پاڵ گەلی فەڵەستین و لوبناندا دەوەستێتەوە.
ئەو لێدوانەی سەرۆکوەزیرانی عێراق لەکاتێکدایە، هەر ئەمڕۆ حکومەتی عێراق، بە بۆنەی کوژرانی حەسەن نەسروڵا، ئەمینداری گشتیی حزبوڵای لوبنانەوە، سێ رۆژ ماتەمینی راگەیاند.
