لڤین
ماوەی چەند رۆژێکە، لە ٢٨ی شوباتەوە، رۆژنامەنووس بەشدار بازیانی و چوار هاوکاری لەلایەن هێزەکانی ئاسایشەوە دەستگیر کراون.
بە پێی بەیاننامەی سەنتەری میترۆ بۆ داکۆکی لە مافی رۆژنامەنووسان، دوای لێکۆڵینەوە، سێ لە هاوکارەکانی بەشدار بازیانی بە ناوەکانی (دانا ساڵح، نەبەز شێخانی، سەردەشت حەمە ساڵح) ئازاد کران. بەڵام جارێکی تر دانا ساڵح بانگ کراوەتەوە بۆ ئاسایش و ئێستا دووبارە لە ژێر لێکۆڵینەوەدایە. هەروەها بەشدار بازیانی تا ئێستاش لە بەندیخانە ماوەتەوە.
سەنتەری میترۆ لە بەیاننامەکەیدا دەڵێت: “میترۆ لە رۆژی دەستگیرکردنیانەوە لە سۆراغی ئەم کەیسە بووە، لە پەرەسەندنەکانی ئاگادارە، هەندێ وردەکاری هەن نامانەوێ لای ئێمەوە بڵاوبکرێنەوە، ئەمە لە چوارچێوەی دەسەڵاتی لایەنی لێکۆڵەر و دادگایە.”
هەروەها سەنتەری میترۆ ئاماژەی بەوە کردووە کە “بە هۆی لیستی تۆمەتەکان، میترۆ وای بەپێویست زانی، چاوەڕوانی بڕیاری دادوەر بین.”
سەرچاوەکان ئاماژە بەوە دەکەن کە تا ئێستا زانیاریی فەرمی لەبارەی تۆمەتەکانی بەشدار بازیانی و هاوکارەکانی بڵاونەکراوەتەوە. رێکخراوەکانی داکۆکی لە مافی مرۆڤ و ئازادی رۆژنامەنووسی چاودێری دۆخەکە دەکەن و داوای شەفافیەتی زیاتر دەکەن سەبارەت بە هۆکارەکانی دەستگیرکردنی ئەم رۆژنامەنووسانە.
کۆمەڵگەی رۆژنامەنووسی لە کوردستان نیگەرانی خۆیان دەربڕیوە سەبارەت بەم بارودۆخە و داوای روونکردنەوەی زیاتریان کردووە
میترۆ سەنتەر رایگەیاندووە کە چاودێری وردی دۆسیەکە دەکات و هەر پێشکەوتنێکی نوێ بە کۆمەڵگەی رۆژنامەنووسی و رای گشتی رادەگەیەنێت.
