لڤین – دیارکۆ جەمال
سبەی یەكەم رۆژی وەرزی نوێی خوێندنی ساڵی 2026-2027 لە هەرێمی كوردستان دەستپێدەكات و تێیدا یەك ملیۆن و 750 هەزار خوێندكار ڕوو لە ناوەندەكانی خوێندن دەكەن.
سبەینێ یەكشەممە 20ـی 9ـی 2026، وەرزی نوێی خوێندنی ساڵی 2026-2027 لە هەرێمی كوردستان دەستپێدەكات و فەرمانگەی میدیا و زانیاری بڵاویكردەوە، لە سەرجەم ناوەندەكاندا زیاتر لە یەك ملیۆن و 750 هەزار خوێندكار بەشداری دەكەن، هاوكات زیاتر لە دوو هەزار خوێندنگەش لە هەرێمی كوردستاندا نۆژەنكراونەتەوە.
بەپێی زانیارییەكان، لە سەرجەم قۆناغەكاندا گۆڕانكاری لە 110 پەرتووكی خوێندندا كراوە بە پێنج زمان و شێوەزاری جیاواز، هەروەها نزیكەی 19 ملیۆن پەرتووكی نوێ چاپكراون، هەروەها زیاتر لە 123 هەزار خوێندكار لە پۆلی یەكەم تۆماركراون و كۆی گشتیی خوێندنگەكانیش زیاتر لە حەوت هەزار و 590 خوێندنگەیە.
لە كابینەی نۆیەمدا تاوەكو ئەیلوولی 2026 لە سەرجەم ناوچەكان 236 خوێندنگە و باخچەی ساوایان دروستكراون، 476 پۆلی خوێندن زیادكراون و دوو هەزار و 650 خوێندنگەش نۆژەنكراونەتەوە.
