لڤین
ئاژانسی هەواڵی چالاکڤانانی مافی مرۆڤ (HRANA) کە بنکەکەی لە ئەمریکایە، لە نوێترین راپۆرتیدا رایگەیاند، لە دەستپێکی هێرشەکان لە 28ـی شوباتەوە، لانیکەم هەزار و 97 هاووڵاتیی سڤیل لە ناو خاکی ئێراندا کوژراون.
بەپێی داتاکانی ئەم ئاژانسە، لە کۆی ئەو ژمارە زۆرەی کوژراوان، 181 کەسیان منداڵ بوون کە تەمەنیان لە خوار 10 ساڵەوەیە. هەروەها ژمارەی برینداران گەیشتووەتە 5,402 کەس، کە 100 منداڵیان لەنێودایە.
بەگوێرەی ئامارەکان، تەنیا لە 24 کاژێری رابردوودا، لانیکەم 104 هێرش بۆ سەر شار و ناوچە جیاوازەکانی ئێران کراوە. “ئەم هێرشانە بنکە سەربازییەکان، ناوەندە پزیشکییەکان و ناوچە نیشتەجێبووەکانیان کردووەتە ئامانج.”
تاران و زۆربەی شارەکانی ئێران و رۆژهەڵاتی کوردستان لە ژێر بۆردوومانی بەردەوامی ئەمریکا و ئیسرائیلدان. فەرماندەیی ناوەندیی ئەمریکا – سێنتکۆم رایگەیاند، لە ماوەی 100 کاژێری شەڕەکەدا 2000 ئامانجیان لە نێو ئێراندا بۆردوومان کردووە.
