لڤین
ئەمڕۆ دووشەممە، 11 خێزانی چەکدارانی داعش کە خاوەن رەگەزنامەی ئوستراڵین و لە 34 کەس پێکهاتون، لە کەمپی “رۆژ” لە رۆژئاوای کوردستان رادەستی وڵاتەکەیان کرانەوە.
کەمپی رۆژ کە دەکەوێتە ناوچەی دێرک لە باکوری رۆژهەڵاتی سوریا، لە ئێستادا 742 خێزانی چەکدارانی داعشی تێدا نیشتەجێیە، کە کۆی گشتییان دەگاتە 2231 کەس. ئەو خێزانانەی لەو کەمپەدا ماونەتەوە، هەڵگری رەگەزنامەی زیاتر لە 40 وڵاتی جیاوازی جیهانن.
پرۆسەی رادەستکردنەوەی ئەم خێزانانە لە چوارچێوەی هەوڵە بەردەوامەکاندایە بۆ گەڕاندنەوەی هاووڵاتییانی بیانی ناو کەمپەکانی رۆژئاوای کوردستان بۆ وڵاتەکانی خۆیان، بە مەبەستی کەمکردنەوەی باری گرانی سەر ئیدارەی خۆبەڕێوەبەری لەو ناوچانەدا.
