لڤین
پارتى داد و گەشەپێدانى تورکیا “ئاکپارتی” بە توندی دژی ڕێپێوان و خۆپیشاندانەکەی دوێنێ دیاربەکر هاتە دەنگ، کە داوای ئازادیی و مافى هیوا بۆ ئۆجەلان کرا.
عومەر چەلیک، گوتەبێژی ئاکپارتی لە پەیامێکدا لە تۆڕە کۆمەڵایەتییەکان، باسی لە ڕێپێوان و خۆپیشاندانەکەى دوێنێی دیاربەکری باکووری کوردستان کرد، کە بۆ داوای جێبەجێکردنی مافی هیوا و ئازادیی عەبدوڵا ئۆجەلان، سازکرا.
چەلیک، کاردانەوەی توندی بەرامبەر بەکارهێنانی دەستەواژەی “دوژمن” بۆ هێزە ئەمنییەکان و پۆلیس لەلایەن خۆپیشاندەرانەوە پیشانداوە و دەڵێت “سەرکۆنەی ئەوانە دەکەین کە بە عەقڵیەتێکی نەفرەتی و زمانێکی ژەهراوییەوە هێزە ئەمنییەکانمان بە دوژمن ناودەبەن و پڕوپاگەندە بۆ تیرۆر دەکەن”.
عومەر چەلیک، دەشڵێت “هەوڵدانی ئەمانە بۆ لەناوبردن و لەباربردنی پرۆسەی تورکیای بێتیرۆر بێهودەیە و وەڵامەکەی لە زەمینەی سیاسیی و یاساییدا وەردەگرنەوە”.
لە ڕێپێوان و خۆپیشاندانەکەى دیاربەکردا هەزاران کەس بەشدارییان کرد و گرژیی لێکەوتەوە. پۆلیس و هێزە ئەمنییەکان گازی فرمێسکڕێژیان بۆ بڵاوەپێکردنی خۆپیشاندەران بەکارهێنا و دروشمەکانیش لەسەر ئاستى تورکیا کاردانەوەیان بەدوای خۆیاندا هێنا.
