لڤین
بەرێوەبەرایەتیی گشتیی تاقیکردنەوەکان و ساڵنامەی خوێندنى وەزارەتى پەروەردە رایگەیاند، لە ئێستادا سیستم ئامادەیە بۆ ساڵی خوێندنی 2025 بۆ 2026 و گواستنەوەی قوتابی و خوێندکاران کاراکراوە، قوتابخانەکان دەتوانن گواستنەوە ئەنجام بدەن.
بەڕێوەبەرایەتییەکە لە راگەیەندراوێکدا دەڵێت، لە ئێستادا پرۆسەی کۆتایی ساڵ و گۆڕینی ئاست بۆ سەرجەم قوتابیان و خوێندکاران لەگشت قۆناغەکانی خوێندن جگە لە پۆلی 12 لە سیستمی “ئی پەروەردە” ئەنجامدراوە.
بەگوێرەى راگەیەندراوەکە، قوتابخانە و خوێندنگاکان دەتوانن پۆلەکان رێکبخەن بەگوێرەى ژمارەی قوتابیان دابەشی سەر پۆلەکانیان بکەن و ئەوەش کارئاسانی دەکات بۆ رێکخستنەوەی میلاک.
ئاماژەى بەوەشدەکات، قوتابخانە خوێندنگاکان و باخچەکان دەتوانن منداڵ و قوتابیان و خوێندکاران تۆماربکەن لە سیستمی “ئی پەروەردە” لە قۆناغی یەکەم و دووەمی باخچە و پۆلی یەکەم و پۆلی ئامادەکاری لە ساڵی خوێندنی 2025 – 2026.
راشیدەگەیەنێت، قوتابی و خوێندکارانی پۆلی نۆیەمی بنەڕەتی ئەوانەی مەبەستیانە درێژە بە خوێندن بدەن لە پەیمانگە حکومی و ناحکومییە خۆماڵییەکان کاری پێویست ئەنجام بدەن بە مەبەستی خۆ تۆمارکردن، بە گوێرەى رێنماییەکانی بەرێوەبەرایەتیی گشتیی پەیمانگەکان.
