قوتابخانەیەک لە شاری کەرکوک بەناوی سۆرانی مامە حەمەوە دەکرێتەوە

بەبڕیاری د.ڕێبوار تەها پارێزگاری شاری کەرکوک ، سبەینی 21ـی تەمووزی 2025، لە حەڤدەیەمین ساڵیادی تیرۆرکردنی شەهیدی قەڵەم ڕۆژنامەنووس (سۆرانی مامە حەمە)، قوتابخانەیەکی نوێ لەشارەکە بەناوی (قوتابخانەی شەهید سۆرانی مامەحەمە)دەکرێتەوە.

هەر سبەینێ کاتژمێر 05:00ـی ئێوارە، دەزگای میدیای لڤین لە شاری سلێمانی لە هۆتێل تایتانیک، مەراسیمی شانزدەیەمین خەڵاتی شەهیدی قەڵەم سۆرانی مامەحەمە بۆ ئازادی ڕۆژنامەگەری بەڕێوەدەبات ، لە مەراسیمەکەدا خەڵات دەدرێتە دوو کەسایەتی و ڕۆژنامەوان.

شەهیدی قەڵەم سۆران مامە حەمە، لە ساڵی 1987 لەشاری کەرکوک لە دایکبووە، ڕۆژنامەنووسێکی سەربەخۆ و چاونەترسی گۆڤاری لڤین بوو و ماوەی سێ ساڵ لە گۆڤارەکەدا کاری کردووە، لە 21ی تەممووزی 2008 لەبەردەم ماڵی خۆیدا تیرۆرکرا.

کەیسی شەهیدی قەڵەم سۆرانی مامە حەمە تا ئێستا بەکراوەیی ماوەتەوە و سەرەڕای پێکھێنانی لیژنەی لێکۆڵینەوە، تاوانباران و ھۆکاری کوشتنی ھێشتا تەواو ڕوون نییە.