لڤین
سەرۆکایەتیی کۆماری عێراق سەرکۆنەی هێرشە درۆنییەکانی سەر شارەکانی هەرێمی کوردستان دەکات و داوا لە هێزە ئەمنییەکان دەکات رێکاری پێویست بگرنەبەر بۆ دۆزینەوەی ئەنجامدەرانی هێرشەکان.
سەرۆکایەتیی کۆماری عێراق راگەیەندراوێکى لە بارەى هێرشە درۆنییەکانى سەر کێڵگەى خورمەڵە لە هەولێر و سەرسنگ لە دهۆک بڵاوکردەوە و رایگەیاند، سەرکۆنەی بە ئامانجگرتنى ئەو کێڵگانە دەکەن و دووبارەبوونەوەی هێرشەکان ئاسایش و سەقامگیری عێراق دەخاتە مەترسییەوە و ژێرخانی ئابووری وڵات لاواز دەکات.
سەرۆکایەتیی کۆماری عێراق دەشڵێت: پێویستە سەرجەم ناوەندە ئابوورییەکان بپارێزێن و کەشێکی گونجاو بۆ وەربەرهێنانی کۆمپانیا بیانییەکان بڕەخسێنرێت بۆ ئەوەی لە وڵاتدا کاربکەن.
سەرۆکایەتیی کۆماری عێراق داواش لە هێزە ئەمنییەکانی عێراق و هەرێمی کوردستان دەکات رێکاری پێویست بگرنەبەر بۆ دۆزینەوەی ئەنجامدەرانی هێرشەکان و رێگریکردن لە دوو بارەبوونەوەیان کە مەترسی لەسەر ئابووری عێراق و ئاسایش و سەلامەتی هاووڵاتیانی دروست دەکەن.
ئەوەش دواى ئەوەدێت، لەماوەى 24 کاتژمێری رابردوودا سێجار سنوورى پارێزگاكانى هەولێر، سلێمانى و دهۆک كەوتوونەتە بەرهێرشى درۆنى، ئەوەش کاردانەوەى ناوخۆیی و نێودەوڵەتى بەدواداهات.
