لڤین
کارگێڕیی زانیاریی وزەی ئەمریکا بڕی هاوردەی نەوتی وڵاتەکەی بۆ هەفتەی رابردوو بڵاوکردەوە، عێراق رۆژانە 214 هەزار بەرمیل نەوتی بۆ ئەمریکا ناردووە.
بەگوێرەی دەزگای زانیاریی وزەی ئەمریکا، هەفتەی رابردوو ئەمریکا لە 9 وڵاتەوە رۆژانە 5 ملیۆن و 491 هەزار بەرمیل نەوتی هاوردەکردووە و بەراورد بە هەفتەی پێشووتری، 309 هەزار بەرمیل نەوتی رۆژانە کەمیکردووە.
لە راپۆتەکەی کارگێڕیی زانیاریی وزەی ئەمریکادا هەناردەی عێراق بۆ ئەمریکا هاتووە کە لە هەفتەی رابردوودا 214 هەزار بەرمیل نەوتی رۆژانە بووە و بڕی 21 هەزار بەرمیل نەوت بەراورد بە هەفتەی پێشووتر هەناردەی عێراق بۆ ئەمریکا کەمیکردووە.
زۆرترین بڕی هاوردەی ئەمریکا لە کەنەداوە بووە کە گەیشتووەتە 3 ملیۆن و 519 هەزار بەرمیل نەوتی رۆژانە و پاش ئەو سعودیە دێت، بەبڕی 578 هەزار بەرمیل نەوتی رۆژانە و دواتریش بەرازیل بەبڕی 409 هەزار بەرمیل نەوتی رۆژانە بووە و عێراق و کۆڵۆمبیا لە پلەی پێنجەمدا هاتوون بەبڕی 214 هەزار بەرمیل نەوتی رۆژانە.
