لڤین

پیێر کراهینبوڵ، بەڕێوەبەری گشتیی کۆمیتەی نێودەوڵەتیی خاچی سوور، لە کۆڕبەندی ساڵانەی ئاسایشی جیهانی لە دەوحە رایگەیاند، لەماوەی شەڕى غەززەدا، زیاتر لە 400 کارمەندی فریاگوزاری و هەزار کارمەندی چاودێریی تەندروستی لە غەززە کوژراون.

پیێر کراهینبوڵ گوتی “زیاتر لە 400 کارمەندی فریاگوزاری و هەزار کارمەندی چاودێریی تەندروستی لە غەززە کوژراون، کە 36یان کارمەندی خاچی سوور و مانگی سوور بوون، لە ئێستا و داهاتووشدا، ئەم کردە تۆقێنەر و نامرۆڤانە بۆ دەیان ساڵ بەئامانجمان دەگرێت و کەس ناتوانێت خۆی لێ بێئاگا بکات، ئەمەش ترس و دڵەڕاوکێی خێزانی بارمتە ئیسرائیلییەکان و زیندانییانی فەڵەستینیش دەگرێتەوە، کە رووبەڕووی کابوسێکی بێکۆتایی دەبنەوە”.

ئاگربەستى ئیسرائیل و حەماس، بە نێوەندگیریی قەتەڕ، میسڕ و ئەمریکا لە 19ی کانوونی دووەمەوە کەوتە بواری جێبەجێکردنەوە و لە سەرەتای مانگی ئازار کۆتاییهات و هەردوولا نەیانتوانی لەسەر هەنگاوەکانی داهاتوو رێکبکەون.

ئیسرائیل لە 18ی ئازاردا هێرشە ئاسمانی و زەمینییەکانی لە کەرتی غەززە دەستپێکردەوە و گەیشتنى هاوکارییە مرۆییەکانی راگرت.

وەزارەتی تەندروستیی غەززە دوایین ئاماری قوربانییانی شەڕی غەززەی بڵاوکردەوە، بەجۆرێک ژمارەی گیانلەدەستدان بۆ 52 هەزار و 314 کەس بەرزبووەتەوە و ژمارەی بریندارەکانیش گەیشتووەتە 117 هەزار و  792 کەس.