لڤین
ئاژانسی هەواڵی رۆیتەرز لە راپۆرتێکیدا بڵاویکردەوە، بەهۆی زۆری بەرهەمی ئەمساڵی گەنم و نەبوونی شوێنی کۆگاکردن عێراق نیو ملیار دۆلار زیانی بەرکەوتووە.
لە راپۆرتەکەی رۆیتەرزدا هاتووە، ئەمساڵ لە کۆی بەرهەمی گەنمی جوتیاران عێراق یەک ملیۆن و 500 هەزار تۆن زیادەی هەبووە، ئەمەش بەهۆی ئەو بڕە بارانەی ئەمساڵ وڵاتەکەی گرتەوە هاوکات ئەو نرخە زیادەیەی بۆ پاڵپشتی جوتیاران دیاریکرابوو.
ئاشکراشیکردووە، عێراق گەنم بە 850 دینار بۆ هەر کیلۆیەک لە جوتیاران دەکڕێتەوە و بە 450 دینار بە ئاشەکانی دەفرۆشێت بۆ بەرهەمهێنانی ئارد، جگە لەوەش وڵاتەکە ساڵانە پێویستی بە 4.5-5 ملیۆن تۆن گەنم هەیە، بەڵام بەرهەمی ئەمساڵ گەیشتووەتە شەش ملیۆن تۆن بەم پێیەش 1.5 ملیۆن تۆن زیادەی هەبووە، بەو هۆیەشەوە وڵاتەکە 458.37 ملیۆن دۆلار زیانی بەردەکەوێت.
لای خۆیەوە حەیدەر نوری بەڕێوەبەری کۆمپانیای دانەوێڵەی عێراق رایگەیاندووە، راستە ئەمساڵ بەرهەمی زیادەی گەنممان هەبووە، بەڵام ئێمە بە زیان هەژماری ناکەین، چونکە تا ئێستا لە ناوخۆی وڵاتدا ماوەتەوە و پارەکەشی بە دیناری عێراقی خەرجکراوە.
