لڤین
سەرۆك وەزیرانی عێراق ڕایگەیاند، رێگە بە هیچ لایەنێک نادەن لە سنوری وڵاتەكەیەوە ببێتە هەڕەشە بۆسەر ئێران، هەروەها دەشڵێت، “هەردو حکومەتی ئێران و عێراق لەگەڵ ئەوە نین گرژییەکانی ناوچەکە و شەڕ فراوان بێت”.
محەمەد شیاع سودانی، سەرۆک وەزیرانی عێراق، ئەمڕۆ چوارشەممە لە کۆنگرەیەکی رۆژنامەوانیی هاوبەشدا لەگەڵ مەسعود پزیشکیان، سەرۆک کۆماری ئێران رایگەیاند، “هاوبەشی لەگەڵ تاران پایەیەکی بنەڕەتی خواستەکانی گەلی عێراق و ئێرانە و پەیوەندییەکانمان مێژوی، بەهێز و دێرینن”.
ئاماژەی بەوەشكرد، رێگە بە هیچ لایەنێک نادەن لە سنوری عێراقەوە ببێتە هەڕەشە بۆسەر ئێران و هێرش بكاتە سەر ئەو وڵاتە.
سەرۆك وەزیرانی عێراق باسی لەوەشكرد، “سەقامگیری ناوچەکە لە مەترسیدایە بەهۆی دەستدرێژییەکانی سەر غەززەوە، هەردو حکومەتی ئێران و عێراق لەگەڵ ئەوە نین گرژییەکانی ناوچەکە و شەڕ فراوان بێت”.
ئەوەشی خستەڕو، پەیوەندی لە نێوان دەزگا ئەمنییەکان بەردەوامە بۆ کۆنترۆڵکردنی سنورەکان و ڕێگریکردن لە قاچاخچێتی، کە زیان بە ئاسایشی ناوخۆی هەردو وڵات دەگەیەنێت.
سەرۆك وەزیرانی عێراق ڕونیكردەوە، “دۆسیە ئابورییە هاوبەشەکانی نێوان عێراق و ئێران دەروازەیەکی گرنگە بۆ گەیشتن بە خواستەکانی هەردو وڵات و باسیان لە هاوكاری ستراتیژی دولایەنەی فراوانکردوە”.
