لڤین
سزای سێدارەی بەندکراوێکی کورد و خەڵکی سایینقەڵا بەناوی فەیزوڵڵا حوسێنپوور، کە پێشتر بە تۆمەتی “کوشتنی بە ئەنقەست” دەستبەسەر کرابوو و لە لایەن دەزگای دادوەریی کۆماری ئیسلامیی ئێرانەوە سزای سێدارەی بەسەردا سەپێندرابوو، لە بەندیخانەی ناوەندیی میاندواو جێبەجێ کرا.
بەپێی ڕاپۆرتی گەیشتوو بە ڕێکخراوی مافی مرۆڤی هەنگاو، بەرەبەیانیی ڕۆژی دووشەممە فەیزوڵڵا حوسێنپوور، باوکی سێ منداڵ، خەڵکی گوندی چراخەواڵ سەر بە شاری سایینقەڵا و دانیشتووی بۆکان، لە بەندیخانەی ناوەندیی میاندواو جێبەجێ کرا.
بە وتەی سەرچاوەکان، ئەو بەندکراوە پێنج ساڵ پێشتر لە ڕەوتی تێکهەڵچوونێکدا بە تۆمەتی کوشتنی بە ئەنقەست دەستبەسەر کرابوو و لە لایەن دەزگای دادوەریی کۆماری ئیسلامیی ئێرانەوە سزای سێدارەی بەسەردا سەپێندرابوو. ناوبراو ڕۆژی ڕابردوو دوایین چاوپێکەوتنی لەگەڵ بنەماڵەی هەبوو.
