لڤین
بەڕێوەبەرایەتی تەندروستیی هەولێر رایگەیاند، حاڵەتێکی دیکەی توشبوون بە نەخۆشیی تای خوێنبەربوون تۆمارکراوە و نەخۆشەکە لەژێر چاودێریی پزیشکیدایە.
تەندروستیی هەولێر لە راگەیەندراوێکدا دەڵێت، توشبووەکە تەمەنی 47 ساڵە و دانیشتوونی شارى هەولێرە و کارى کڕین و فرۆشتنی ئاژەڵ دەکات و لە هەمان کاتیشدا گۆشتفڕۆشە و ئاژەڵیش لە ماڵان سەردەبڕێت.
بەگوێرەى راگەیەندراوەکەی بەڕێوەبەرایەتیی تەندروستیی هەولێر، توشبووەکە لە توشبووەکە لە بەروارى 21ی ئەم مانگەوە دۆخی تەندروستی تێکچووە و لە چەند نۆڕینگەیەکی چارەسەری وەرگرتووە، بەڵام بارى تەندروستی بەرەو خراپتر رۆیشتووە و دوای دڵنیابوون و پشکنین، دەرکەوتووە توشبووی تای خوێنبەربوونە.
تەندروستیی هەولێر راشیگەیاندووە، لەئێستادا توشبووەکە لەژێر چاودێری پزیشکیدایە و لەلایەن پزیشکی پسپۆڕەوە چارەسەر دەکرێت.
لە عێراق، بەگوێرەی دوایین ئاماری وەزارەتی کشتوکاڵ، ژمارەی تووشبووانی تای خوێنبەربوون گەیشتووەتە 179 حاڵەتی پشتڕاستکراوە، لەنێویاندا 23 حاڵەتی گیانلەدەستدان هەن.
