لڤین
رێکخراوی منداڵانی سەربە نەتەوەیەکگرتووەکان – یونسێف، رایگەیاند، لە ماوەی 10 رۆژدا لە دوای دەستپێکردنەوەی بۆردوومانەکانی ئیسرائیل بۆسەر غەززە، لانیکەم 322 منداڵ لە کەرتەکە کوژراون.
یونسێف لە راگەیەندراوێکدا ئاماژەی بەوەکردووە، “بەهۆی شکستی ئاگربەست و دەستپێکردنەوەی ئۆپراسیۆنە ئاسمانی و زەمینییەکان لە کەرتی غەززە، لانیکەم 322 منداڵ کوژراون و 609 منداڵی دیکەش برینداربوون”.
یونسێف لە راگەیەندراوەکەیدا باس لەوە دەکات، “زۆربەی منداڵانى کەرتەکە ئاوارەبوون و پەنایان بردووەتە بەر چادرەکان”.
کاترین روسیل، بەڕێوەبەری جێبەجێکاری یونسێف باس لەوەدەکات، ئاگربەستەکە تۆڕێکی سەلامەتیی دابینکرد، کە منداڵانی غەززە پێویستیان پێی بوو، بەڵام جارێکی دیکە منداڵان کەوتوونەتە ناو توندوتیژییەوە و دەکرێنە قوربانی.
ئیسرائیل لە 18ـی ئازاردا بۆردوومانی چڕی بۆسەر کەرتى غەززە دەستپێکردەوە و دواتر هێرشێکی نوێی زەمینیی دەستپێکرد و کۆتایی بە ئاگربەستێکی نزیکەی دوو مانگە لە شەڕی لەگەڵ حەماسدا هێنا، دوای ئەوەی دانوستانەکانی قۆناغی دووەمى غەززە گەیشتنە بنبەست.
لە سەرەتای دەستپێکردنەوەی شەڕەکانەوە، وەزارەتی تەندروستیی بزووتنەوەی حەماس لە کەرتی غەززە رایگەیاند، لانیکەم هەزار کەس بەهۆی هێرشەکانی ئیسرائیلەوە گیانیان لەدەستداوە.
بەگوێرەى ئامارەکانی وەزارەتی تەندروستیی کەرتی غەززە، لە هەڵمەتی سەربازیی ئیسرائیل بۆسەر کەرتەکە لە 7ـى ئۆکتۆبەرەوە، لانیکەم 50 هەزار و 35 کەس لە غەززە کوژراون کە زۆرینەیان خەڵکی مەدەنین و 15 هەزاریش لەوانەى گیانیان لەدەستداوە، منداڵ بوون.
