لڤین
سەرۆك وەزیرانی عێراق، دووپاتی کردەوە عێراق ئامادەیە بۆ هاوکاریکردن لە پێناو بەرقەرارکردنی ئاسایش و سەقامگیری لە ناوچەکە.
ئەمڕۆ چوارشەممە ١٨ـی ١٢ـی ٢٠٢٤، نوسینگەی راگەیاندنی سەرۆكی وەزیرانی عێراق رایگەیاند، محەمەد شیاع سودانی، گەشتۆتە وڵاتی سعودیە و لە شاری عولا لەگەڵ شازادە محەمەد بن سەلمان کۆبوونەتەوە و تاوتوێی دوایین پێشهاتەکانی ناوچەکە و گرنگی رێککەوتن لەسەر هەماهەنگی هاوبەش سەبارەت بە کاردانەوەی رووداوەکانی سوریا کراوە.
ئاماژەی بەوەشکرد، كه لەمیانەی کۆبوونەوەکەدا تاوتوێی دوایین پێشهاتەکانی ناوچەکە و گرنگی رێککەوتن لەسەر هەماهەنگی هاوبەش سەبارەت بە کاردانەوەی رووداوەکانی سوریا کراوە، لەگەڵ چڕکردنەوەی هەوڵەکان بۆ رووبەڕووبوونەوەی ئاستەنگە ناوچەیی و نێودەوڵەتییەکان، بەشێوەیەک کە بەشداربن لە بەهێزکردنی ئاسایشی ناوچەیی و سەقامگیری سەرتاسەری ناوچەکە.
ئەوەشی خستەڕوو، سەرۆکی ئەنجومەنی وەزیران جەختی لەسەر پەرۆشی عێراق کردەوە، بۆ یەکگرتوویی خاکی سوریا و دەستوەرنەدان لە کاروباری ناوخۆیی و رێزگرتن لە ئیرادەی ئازادی گەلەکەی و دڵنیابوون لە بەشداری کردنی سەرجەم پێکهاتەکانی گەلی سوریا لە بەڕێوەبردنی وڵاتدا.
هەروەها، سهرۆك وهزیران ئامادەیی عێراقی نیشاندا بۆ هاوکاری کردن لەگەڵ برایان و دۆستان لە ناوچەکە، لەپێناو چەسپاندنی ئاسایش و سەقامگیری و دوورخستنەوەی ناوچەکە لەمەترسی شەڕ و پێکدادان.
