لڤین
بڕیارە سبەی شەممە، بۆ دیاریكردنی ڕۆژی جەژنی ڕەمەزان، لیژنەی باڵای بینینی مانگ لە وەزارەتی ئەوقاف و كاروباری ئایینی كۆ ببێتەوە، كە لیژنەیەكی هاوبەشە لەنێوان وەزارەتی ئەوقاف و یەكێتیی زانایانی ئایینی ئیسلامیی كوردستان، لەمبارەیەوە، وتەبێژی وەزارەتی ئەوقاف ڕایدەگەیەنێت، خەڵكی كوردستان چاوەڕێی بڕیاری ئەو لیژنەیەن.
نەبەز ئیسماعیل، گوتەبێژی وەزارەتی ئەوقاف و كاروباری ئایینی ڕاگەیاند: “سبەی 29ی ڕەمەزان، لیژنەی باڵای بینینی مانگ لە وەزارەتی ئەوقاف و كاروباری ئایینی بە هەماهەنگی لەگەڵ لیژنە لاوەكییەكانی پارێزگاكان و ئیدارە سەربەخۆكانی كوردستان كۆ دەبێتەوە و چاودێری بینینی مانگ دەكەن.”
لەبارەی ئەو لیژنانەی كە چاودێری بینینی مانگ دەكەن، گوتەبێژی وەزارەتی ئەوقاف وتی: “لە پارێزگای هەولێر لە سەنتەر و لە سنووری چۆمان و حاجی ئۆمەران، لە سلێمانی لە چیا گلەزەردە، لە دهۆك لە چیای زاوا، چاوێری بینینی بانگ دەكرێت، ئەگەر سبەی شەممە مانگ بە بەڵگەوە لە ئاسمانی كوردستان ببینرێ، ئەوا بە دڵنیایەوە ڕۆژی یەكشەممە دەبێتە یەكەمین ڕۆژی جەژنی ڕەمەزانی پیرۆز، ئەگەریش سبەی ئێوارە مانگ بە بەڵگەوە نەبینرێ، ڕۆژی دووشەممە دەبێتە یەكەمین ڕۆژی جەژنی ڕەمەزانی پیرۆز.”
باسی لەوەش كرد، كە “بڕیاری ڕاگەیاندنی جەژن، لە دەسەڵاتی لیژنەی باڵای بینینی مانگە لە وەزارەتی ئەوقاف و كاروباری ئایینی، كە لیژنەیەكی هاوبەشە لەنێوان وەزارەتی ئەوقاف و یەكێتیی زانایانی ئایینی ئیسلامیی كوردستانە، بۆیە هەر بڕیارێك بدرێ، بڕیارێكی دروستە و هەموو خەڵكی هەرێمی كوردستان چاوەڕێی بڕیاری ئەو لیژنەیەن.”
